Parlamenttik tyńdaý: Senatta agroónerkásiptik keshendi damytý máselesi talqylanýda
NUR-SULTAN. QazAqparat – QR Parlamenti Senatynyń Tóraǵasy Darıǵa Nazarbaeva aýyl sharýashylyǵy salasynyń problemalary týraly biregeı jáne qarama-qaıshylyqtarǵa toly materıaldar jınalǵanyn aıtty, dep habarlaıdy QazAqparat tilshisi.
«Búgin biz sizdermen árbir qazaqstandyqty alańdatatyn – aýyl taqyrybyn, bizdiń jer resýrstarymyzdy damytý máselelerin talqylaýǵa jınalyp otyrmyz. Bizder úshin aýyl neni bildiredi? Aýyl – bizdiń ulttyq bolmysymyzdyń besigi. Qazaqtyń túp-tamyry aýylda jatyr, aýyl otanshyldyqtyń qaınar kózi jáne baıyrǵy dástúrlerdiń bulaǵy. Sondyqtan aýyldy damytý máseleleri árqaısymyzǵa óte jaqyn jáne túsinikti. Bul aýyldyq jerlerde turatyn 42 paıyz qazaqstandyqtarǵa ǵana emes, barsha Qazaqstan halqyna qatysty úlken másele. Búgingi tańda jalpy tabystyń ósýine qaramastan, aýyl turǵyndarynyń jaǵdaıy jaqsy emes», - dep toqtaldy D. Nazarbaeva Senatta agroónerkásiptik keshendi damytý taqyrybyna arnalǵan parlamenttik tyńdaýda.
Senat spıkeri aýyl sharýashylyǵy Qazaqstan ekonomıkasynyń negizgi salasy ekenin, elimiz árqashan astyq óndirýmen tanymal bolǵanyn atap ótti.
«Al halqymyzdyń ómir saltynyń ajyramas bóligi mal sharýashylyǵy, ol ejelden ár qazaqqa ıntýıtıvti turǵyda jaqyn, genetıkalyq deńgeıde túsinikti. Halqymyz týǵan jerge erekshe qurmetpen qarap kelse de, nege aýyl sharýashylyǵy kóp jyldar boıy ekonomıkanyń problemaly salasy bolyp keledi? Bul jaǵdaı búgin baıqap otyrǵanymyzdaı qoǵammen, ásirese, aýyldyq jerlerdiń turǵyndarymen aýqymdy áńgime, kásibı suhbatty qajet etedi. Qazaqstanda Óńirlik damý mınıstrligi joq. Senat - jergilikti máslıhattar saılaǵan senatorlar arqyly óńirlerdi ınstıtýtsıonaldy túrde kórsetetin jalǵyz ulttyq organ. Aýyldyq jerlerdi damytýǵa baılanysty aımaqtyq damýdyń áleýmettik problemalary kóp jaǵdaıda bizdiń de jaýapkershilik aımaq ekenine senimdimin. Parlamenttik tyńdaýlardyń qarsańynda Senat depýtattary uıymdastyrýmen qatar kóptegen mańyzdy jumystar atqardy. Tıisti departamentterdiń, memlekettik korporatsııalardyń, fermerlerdiń kásibı birlestikteriniń ókilderimen, óńirlerde aýyl sharýashylyǵynda jumys jasaıtyn adamdarmen ondaǵan kezdesýler ótti. Salanyń problemalary týraly biregeı jáne qarama-qaıshylyqtarǵa toly materıaldar jınaldy», - dedi Darıǵa Nazarbaeva.
Onyń sózine qaraǵanda, aýyl sharýashylyǵynyń Jalpy ishki óniminiń úlesi 10 jyl ishinde 5 paıyzdan asqan joq, al sońǵy jyldary turaqty túrde tómendep keledi.
