Parlamenttik tyńdaý: áleýmettik-kásipkerlik korporatsııalarynyń kóbi tıimsiz

ASTANA. QazAqparat – Eldegi áleýmettik-kásipkerlik korporatsııalarynyń jumysynda tıimsiz tustar kóbeıip ketti. Senattyń Ekonomıkalyq saıasat, ınnovatsııalyq damý jáne kásipkerlik komıtetiniń hatshysy Serik Shaıdarov óńirlerdi damytý jónindegi Parlamenttik tyńdaýda osyndaı pikir bildirdi, dep habarlaıdy QazAqparat tilshisi.

«2019-2021 jyldary «Jetisý» áleýmettik-kásipkerlik korporatsııasy «Aqsý qant» jaýapkershiligi shekteýli seriktestigine 3,3 mlrd teńgege paıyzsyz kómek kórsetti. Onyń 2,7 mlrd teńgesi shart boıynsha merziminde qaıtarylmaǵan.

Áleýmettik korporatsııalardyń kóbi tıimsiz. Máselen, on áleýmettik korporatsııanyń («Kokshe», «Aqtóbe», «Atyraý», «Kaspıı», «Taraz», Aqjaiyq, «Soltústik», «Saryarqa», «Astana», «Pavlodar») 2019-2021 jyldardaǵy jıyntyq shyǵyny shamamen 17,4 mlrd teńge boldy», - dedi ol.

Senatordyń málimeti boıynsha, áleýmettik korporatsııalardyń tabysty jumys istep jatqany kúmán týdyrady.

«Óıtkeni, ol negizinen depozıtterge salǵan bıýdjet qarajatynyń paıyzdary esebinen, sondaı-aq balansqa berilgen memlekettik múlikti jalǵa berýden qalyptasady. Demek, áleýmettik korporatsııalardyń naqty qyzmeti negizgi maqsat-mindetterine sáıkes kelmeıdi.

Qoldanystaǵy Óńirlik damý ınstıtýttaryna transformatsııalaý úshin áleýmettik korporatsııalardyń qyzmetin retteý baǵytyndaǵy jeke zań ázirleý oryndy dep sanaımyz.

Áleýmettik korporatsııalar arqyly jer ýchaskelerin berý mehanızmin zańnamamen retteý qajet. Óıtkeni, dál osy salada sybaılas jemqorlyqqa jol kóp», - dedi Serik Shaıdarov.