Parlamenttik saılaýda qysym kórsetilse, qaıda júginý kerek

NUR-SULTAN. QazAqparat – QR Kásipodaqtar federatsııasy tóraǵasynyń orynbasary Nurlan Óteshev parlamenttik saılaýda jumys berýshi tarapynan qysym jasalǵanda qaıda shaǵymdaný qajettigin túsindirdi, dep habarlaıdy QazAqparat tilshisi.

«Jumysshylarǵa qysym jasaý týraly derekterdi qalaı jınaımyz? Facebook-te respýblıkalyq jáne oblystyq deńgeıde óz paraqshalarymyz bar, sonda tikeleı habarlama jibere alasyz. Munda jalǵan akkaýnt hattaryn qarastyrmaımyz, tek shynaıy paıdalanýshylar shaǵymyn qabyldaımyz. Odan bólek, kez kelgen kásiporynda kásipodaq chaty bolady, kásipodaq jelisi boıynsha osy chattarǵa jaza alasyz. Bizde arnaıy Vatsapp nómiri bar ([phone]), bul nómirdi pandemııanyń alǵashqy tolqynynda senim telefony retinde qoldanǵanbyz. Sol chatta barlyq naqty shaǵymdardy qabyldaımyz, tekseremiz jáne taldaý júrgizemiz. Qorytyndysyn óz esebimizge qosamyz jáne tıisti saıası partııalarǵa habarlaımyz», - dep túsindirdi Nurlan Óteshev Nur Otan partııasynyń ókilderimen kezdesýde.

Sonymen birge, N. Óteshev saılaý naýqanynda saılaýshylar men komıssııalarǵa qysym kórsetilgende qandaı shara qoldanylatynyn aıtty.

«Eń aldymen saılaý aldyndaǵy jarys kezinde qysym jasaýshynyń abyroı-bedeline nuqsan keledi. Táýelsiz baıqaýshylardan kelip túsken qysym jasaý týraly kez kelgen aqparat mańyzdy – mysaly, jumys berýshi qaramaǵyndaǵy qyzmetkerlerge belgili bir partııany nusqaýy múmkin. Biz ártúrli jelilerde baıqaýshylardyń qalaı daıyndalatynyn kórip, taldaý júrgizemiz. Jekelegen shaǵyn toptardaǵy baıqaýshylar soǵysqa daıyndalyp jatqandaı kórinedi. Biz úshin bul túsiniksiz, óıtkeni baıqaýshy bul protseske múldem qosyla almaıdy. Ol tek faktini tirkep, keıingi esepte kórsetý úshin joǵary jaqqa baǵyttaı alady», - dedi ol.

Óz kezeginde Nur Otan ortalyq apparaty basshysynyń orynbasary Arman Qapesov qysym jasalǵan jaǵdaı abyroı-bedelge ǵana nuqsan kelmeıtinin jetkizdi.

«Abyroı-bedelden buryn, saılaýshylarǵa, komıssııa múshelerine naqty qysym kórsetilse, ákimshilik jáne qylmystyq jaýapkershilik qarastyrylǵan», - dedi partııa ókili.

Aıta keteıik, QR Kásipodaqtar federatsııasy saılaýshylarǵa qysym jasaýǵa jol bermeýdi eskertý úshin saıası partııalardyń ókilderimen kezdesýdi bastady. Búgin Nur Otan partııasynyń ókilderimen jıyn ótti.