Parlamenttik kanıkýldy bir aıǵa deıin qysqartý kerek - S.Aqylbaı
ASTANA. QazAqparat - Parlamenttik kanıkýldy bir aıǵa deıin qysqartý kerek. Búgin Astanada QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Senat depýtaty Serik Aqylbaı osyndaı pikir bildirdi.
Eske sala keteıik, Parlamenttiń tórtinshi sessııasynyń ashylýy barysynda Memleket basshysy depýtattyq kanıkýl merzimin qysqartý týraly másele qoıǵan edi.
«Óz basym bir aıdan artyq demala almaımyn. Sonymen qatar demalysty qysqartýǵa kelsek, bizge barsha jurt sekildi, onyń ishinde Úkimetpen birdeı jumys istep, demalystyń bir aıyn sınhrondy jumys isteýge arnaǵan durys shyǵar. Óıtkeni depýtattar kanıkýlda bolǵanda da Úkimet zań jobalaryn engizedi, alaıda biz joqpyz. Osynyń saldarynan zań shyǵarý úderisi shamaly kidiristep qalady», - deıdi Serik Aqylbaı.
Onyń paıymynsha, depýtattyq kanıkýldy qysqartý zań shyǵarý úderisin úzdiksiz júrgizýdi qamtamasyz ete alady. Bul óz kezeginde Parlamentke de, Úkimetke de tıimdi, halyqqa da paıdaly.
Al senator Rashıt Ahmetov te mundaı bastamany qoldaıtynyn aıtyp, áriptesine tolyq qosylatynyn jetkizdi.
«Zańdar ýaqytyly qabyldanýy kerek bolsa, oǵan eshqandaı kedergi bolmaýy kerek. Al óńirlerge saparǵa kelsek, muny da qysqartý arqyly ońtaıly sheshimge kelýge bolady», - deıdi R.Ahmetov.
