Parlamenttik kanıkýl kezinde jumysymyz toqtamaıdy - Senat tóraǵasy

ASTANA. QazAqparat – Búgin Senattyń jalpy otyrysynda palata tóraǵasy Máýlen Áshimbaev osy sessııanyń jumysyn qorytyndylady, dep habarlaıdy QazAqparat tilshisi.

«Búgin segizinshi shaqyrylymdaǵy Parlamenttiń birinshi sessııasy aıasynda Senattyń qorytyndy otyrysyn ótkizdik. Sessııa naýryz aıynyń sońynda ǵana bastaldy. Soǵan qaramastan, osy ýaqyt ishinde Memleket basshysynyń elimizdi jańǵyrtýǵa arnalǵan reformalaryn zańnamalyq turǵydan qamtamasyz etý úshin aýqymdy jumys atqaryldy. Úsh aı merzimde Parlament 25 zań qabyldady. Olardyń ishinde 10 zańǵa depýtattyq korpýs bastamashyl boldy», - dedi M. Áshimbaev.

Senat spıkeri palatanyń óńirlermen ózara is-qımyldy nyǵaıtý baǵytyndaǵy jumystardyń qorytyndysyna da toqtaldy. Ol sessııa barysynda Jergilikti ókildi organdarmen ózara is-qımyl jasaý jónindegi keńestiń jáne «Óńir» depýtattyq tobynyń quramdary jańaryp, otyrystary ótkizilgenin tilge tıek etti.

Máýlen Áshimbaevtyń aıtýynsha, osy sessııada depýtattardyń zań shyǵarý quqyǵyn iske asyrýǵa járdemdesetin jańa tetik – Senattyń Jobalyq keńsesi quryldy. Senat janyndaǵy Jas sarapshylar klýbynyń otyrystary da turaqty túrde ótkizilip keledi. Memleket basshysynyń tapsyrmasyna sáıkes, Parlamentte «Bir el – bir múdde» depýtattyq toby jasaqtalyp, onyń quramyna Qazaqstan halqy Assambleıasynan saılanǵan depýtattar endi. Ornyqty damý maqsattaryna monıtorıng júrgizý jónindegi parlamenttik komıssııanyń alǵashqy otyrysy ótkizilgeni de belgili.

«Senattyń mańyzdy mindetteriniń biri – Prezıdentimizdiń reformalaryn zańnamalyq turǵydan sapaly ári ýaqtyly qamtamasyz etý. Erteń palatalardyń birlesken otyrysy ótedi. Onda birinshi sessııanyń jumysyna qorytyndy jasalady, sodan keıin parlamenttik kanıkýl bastalady. Parlamenttik kanıkýl kezinde jumysymyz toqtamaıtyny belgili. Bizdiń palata - óńirlerdiń múddesin qorǵaıtyn negizgi ınstıtýt. Sondyqtan, óńirlerge barǵan kezde, halyqpen belsendi kezdesip, jergilikti jerlerdegi ózekti máselelerdi jan-jaqty saraptaısyzdar dep oılamyn», - dedi dedi Máýlen Áshimbaev.

Aıta keteıik, 27 maýsym kúni Májilis tóraǵasy Erlan Qoshanov VIII saılanǵan QR Parlamentiniń birinshi sessııasyndaǵy palatanyń jumysyn qorytyndylady.

Al, 30 maýsymda Parlament palatalarynyń birlesken otyrysy ótip, Parlamenttiń birinshi sessııasy resmı túrde jabylady.