Parlamenttegi partııalar bir palataly júıege kóshý máselesin qoldaý bildirdi
ASTANA. KAZINFORM — Memlekettik keńesshi Erlan Qarın Parlament Májilisindegi saıası partııalardyń fraktsııa jetekshilerimen kezdesý ótkizdi. Bul týraly Aqorda málim etti.
Basqosýǵa «Amanat» partııasy fraktsııasynyń jetekshisi Elnur Beısenbaev, «Aýyl» partııasy fraktsııasynyń jetekshisi Serik Egizbaev, «Respublica» partııasy fraktsııasynyń jetekshisi Aıdarbek Qojanazarov, «Aq jol» partııasy fraktsııasynyń jetekshisi Azat Perýashev, Qazaqstan Halyq partııasy fraktsııasynyń jetekshisi Magerram Magerramov, Jalpyulttyq sotsıal-demokratııalyq partııasy fraktsııasynyń jetekshisi Ashat Raqymjanov jáne Prezıdenttiń Parlamenttegi Ókildiginiń basshysy Ámirbek Ospanbekov qatysty.
Memlekettik keńesshi bir palataly jańa Parlamentke kóshý bastamasyna qatysty negizgi tásilderdi qalyptastyrýǵa belsene atsalysqany úshin partııa fraktsııalaryna rızashylyq bildirdi. Erlan Qarınniń aıtýynsha, byltyrǵy kúzden beri júrgizilip kele jatqan konstıtýtsııalyq reformany ázirleý isi memlekettiń ınstıtýtsıonaldyq negizderin odan ári jańǵyrtýda aıryqsha mańyzdy.
Sondaı-aq Memlekettik keńesshi Ulttyq quryltaıdyń Qyzylordada ótken otyrysynyń basymdyqtaryna erekshe toqtaldy.
— Quryltaıdyń bul jolǵy otyrysy da, Prezıdenttiń baǵdarlamalyq sózi de tarıhı turǵydan úlken mánge ıe. Memleket basshysynyń saıası ınstıtýttardy tereń transformatsııalaý bastamasy túbegeıli jańa konstıtýtsııalyq modelge qadam basqanymyzdy aıǵaqtaıdy, — dedi Erlan Qarın.
Óz kezeginde fraktsııa jetekshileri Prezıdent bastamalaryn tolyq qoldap, konstıtýtsııalyq reformaǵa qatysty jumysty belsendi túrde jalǵastyrýǵa daıyn ekenderin aıtty.
Aıta keteıik, Memlekettik keńesshi Erlan Qarın Qyzylordada ótip jatqan V Ulttyq quryltaıdyń alǵashqy kúninde 200-den astam usynys aıtylǵanyn málim etken edi.