Áıelderdiń qoǵamdaǵy kóshbasshylyq róli arta túsedi degen senim bar – Qaraqat Ábden

ASTANA. KAZINFORM – Elimizde qyz-kelinshekterdiń qoǵamdyq-saıası ómirdegi belsendiligi áli de ortasha deńgeıde. Máselen, Parlamenttegi áıelderdiń úlesi 18 paıyzdan aspaıdy. Bul týraly Májilis depýtaty, qoǵam qaıratkeri Qaraqat Ábden «Radio Jibek Joly» stýdııasynda bergen suhbatynda málimdedi. 

– Búginde qoǵam aıtarlyqtaı ózgerdi. Belsendilik tek bızneste ǵana emes, saıasatta da aıqyn baıqalady. Jalpy qoǵam serpindi damyp keledi. Sonyń ishinde áıelderdiń belsendiligi de artyp otyr. Qazaqtyń qyz-kelinshekteri qashanda erkindikti qadirlegen. Eshkimdi renjitkim kelmeıdi, degenmen qazaq áıeliniń orny tarıhta da, qazirgi qoǵamda da erekshe ekenin aıtý kerek. Alaıda búgingi statıstıka kóńil kónshitpeıdi. Muny ashyq aıtýymyz qajet. Qazirgi tańda Parlamenttegi áıelderdiń úlesi 18 paıyzdan aspaıdy. Al bılik qurylymdaryna, Úkimettegi áıelderdiń sanyna kelsek, olardyń úlesi 20 paıyzdan joǵary emes. Bul – óte mańyzdy másele, - dedi Qaraqat Ábden.

Osy tusta spıker atalǵan másele Memleket basshysynyń nazarynda ekenin atap ótti. 2022 jyly Qasym-Jomart Toqaev qazaqstandyq áıelderdiń kóshbasshylyq deńgeıi 30 paıyzdan tómen bolmaýy tıis ekenin aıtqan bolatyn.

– Memleket basshysynyń bul talaby bızneske de, saıasatqa da, jeke jáne memlekettik sektorǵa da qatysty. Osy baǵytta naqty mindetter qoıylyp, júıeli jumystar júrgizilip keledi. Aldaǵy ýaqytta bul kórsetkishter rettelip, áıelderdiń qoǵamdaǵy kóshbasshylyq róli arta túsedi degen senim bar, - dedi Májilis depýtaty.

Aıta keteıik, jaqynda álemde parlamenttegi áıelder úlesi eń kóp ósken elder anyqtaldy.