Parlamentte syrtqy jarnamalardyń qazaq tilinde durys jazylýyn talap etetin qujat qabyldandy
Zań jobasynyń maqsaty – syrtqy jarnamalar men ártúrli mańdaıshalardaǵy, basqa da rekvızıstter men kórneki aqparattardyń memlekettik tilde durys jazylýy jáne mátinderdiń túpnusqaly aýdarmasy boıynsha qosymsha talaptardy belgileý. Budan basqa, din salasyndaǵy zańnamany jetildirýdi kózdeıtin normalar engizildi.
«Atalǵan zań jobasyn Parlament Májilisi 2021 jylǵy 6 qazanda maquldady jáne ol Parlament Senatyna qabyldanǵan 54 pozıtsııamen jiberildi.
Senat «Dinı qyzmet jáne dinı birlestikter týraly» zańyna ar-ojdan bostandyǵy quqyǵyn júzege asyrý, dinı is-sharalardy ǵıbadat úılerinen (ǵımarattardan) tys jerlerde ótkizý úshin engiziletin habarlama tártibin rásimdeý ári naqtylaý bóliginde túzetýler engizdi.
Májilistiń Áleýmettik-mádenı damý komıteti «Qazaqstan Respýblıkasynyń keıbir zańnamalyq aktilerine kórneki aqparat jáne dinı qyzmet máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristermen kelisýdi usynady», - dedi Májilis depýtat Jámılá Nurmanbetova.
Qujatty qaraý kezinde palata depýtattary bul usynysqa qoldaý bildirdi.
Aıta keteıik, jaqynda Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kórneki aqparat jáne dinı qyzmet máseleleri boıynsha ózgerister men tolyqtyrýlar engizý týraly» zań jobasy eki oqylymda qaraldy.
Qujatqa túzetýler engizilgendikten, zań jobasy Májiliske qaıtaryldy.
