Parlamentte Sergeı Dıachenkony eske alý sharasy ótti
ASTANA. QazAqparat - Búgin Parlament Májilisinde Sergeı Dıachenkony eske alýǵa arnalǵan shara ótti, dep habarlaıdy QazAqparat.
Esterińizge sala keteıik, uzaqqa sozylǵan aýyr syrqatynan keıin 2016 jyly 26 qazanda kórnekti qoǵam qaıratkeri, QR Parlamenti Májilisiniń depýtaty Sergeı Dıachenko ómirden ozdy. Onyń súıegi Ulttyq panteon aýmaǵynda jerlendi.
Biz búgin dosymyz ári áriptesimizdiń esteligine shynaıy qurmet kórsetip jatyrmyz. Ýaqyt jyldam ótip jatyr, onyń ómirden ozǵanyna bir jyl ótip ketti. Biz aramyzda syıly áriptesimizdiń orny oısyrap turǵanyn ańǵaramyz. Sergeı Aleksandrovıchtiń ómir joly Otanǵa qyzmet etýdiń jarqyn kórinisi. Ol elge shynaıy, janashyrlyqpen qyzmet etken adam. Prezıdent ony joǵary baǵalady, osyǵan dálel retinde Sergeı Dıachenko atqarǵan kóptegen memlekettik laýazymdar, qoǵamdyq qyzmetter óte mańyzdy boldy», - dedi Májilis Tóraǵasy Nurlan Nyǵmatýlın búgingi jıynda.
Osy oraıda Sergeı Dıachenkonyń qoǵamdyq-saıası, ekonomıkalyq jáne mádenı-gýmanıtarlyq salalardy damytýǵa sińirgen eńbegi erekshe atap ótildi.
Sonymen qatar N. Nyǵmatýlın óz sózinde Sergeı Aleksandrovıchke arnalǵan «Otan men halyqqa arnalǵan ǵumyr» atty kitap shyǵarylǵanyn jetkizdi.
«Kitaptyń ataýy onyń ómirlik ustanymyna saı kelip tur. Kitapta onyń jaqyn dostary estelikterin jazyp, birge ótkergen jyldar jaıynda baıandaıdy. Osynyń barlyǵyn oqyǵan kezde onyń kóp qyrly tulǵalyǵyn, adamgershilik úlken qasıetin eske alasyń», - dedi Májilis Tóraǵasy.
Óz kezeginde Sergeı Dıachenkonyń zaıyby Lıdııa Borısovna kórsetilgen qurmet úshin Elbasyna, Parlament depýtattaryna úlken alǵysyn jetkizdi.
Aıta keteıik, eske alý sharasyna Parlament depýtattary, qoǵam qaıratkerleri, sondaı-aq Sergeı Aleksandrovıchtiń týǵan-týysqandary men otbasy músheleri qatysty.
