Parlamentte saıası partııalardyń ókildigi 2 ese ósti
«Parlament depýtattarynyń kezekten tys saılaýy ótken jyldyń maýsym aıynda bolǵan respýblıkalyq referendýmdaǵy jalpyhalyqtyq daýys berý nátıjeleri boıynsha bastalǵan úlken eldik saılaý tsıklin aıaqtaıdy. Konstıtýtsııalyq reformanyń qorytyndylary boıynsha bıliktiń ókildi tarmaǵyn qalyptastyrýdyń jańa básekelestik erejeleri zańmen rásimdeldi. Saılaýdy ótkizýdiń jańa formaty múddeli azamattardyń saıası qatysý múmkindigin edáýir keńeıtti jáne saılaý salasyn jandandyrdy. Partııalyq tizimder boıynsha jáne bir mandattyq okrýgterde saılaý arqyly Parlament Májilisin qalyptastyrý saılaýshylarǵa saıası partııalardyń platformalaryna da, naqty kandıdatýralarǵa da daýys berýge múmkindik berdi», - dedi ol OSK otyrysynda.
Onyń atap ótýinshe, saılaýaldy jarysqa qatysqan barlyq partııa jańa kreatıvti sheshimder taýyp, úgit kezeńinde azamattarǵa óz baǵdarlamalarynyń myqty tustaryn kórsete aldy.
«Ótken saılaý nátıjesinde Parlamentte saıası partııalardyń ókildigi aldyńǵy saılaýmen salystyrǵanda 3-ten 6-ǵa deıin 2 ese ósti. 29 depýtat óńirlerden saılaýshylardyń múddelerin bildiredi jáne olarmen ınteraktıvti mandat arqyly baılanysty. Osylaısha, saılaý básekelestik jáne ashyqtyq qaǵıdattarynda ótti. Olardyń qorytyndylary boıynsha Parlament Májilisiniń depýtattyq korpýsy aıtarlyqtaı jańartyldy», - dedi Nurlan Ábdirov.
Buǵan deıin Ortalyq saılaý komıssııasy Parlament Májilisiniń 8-saılanymy depýtattaryn tirkegenin jazǵan edik.
