Parlamentte «Saqtandyrý máseleleri boıynsha birqatar zań aktilerine ózgerister men tolyqtyrýlar engizý týraly» QR zań jobasy qaralýda
ALMATY. Naýryzdyń 18-i. QazAqparat /Erlik Erjanuly/ - Parlamentte qaralyp jatqan zań jobasynda táýelsiz aktýarııler ınstıtýtyn engizý qarastyrylǵan. Bul búgin Almatyda ótip jatqan Ortalyq Azııadaǵy saqtandyrý týraly IV halyqaralyq konferentsııada aıtyldy,
dep habarlaıdy QazAqparat.
QR Qarjy naryǵy men qarjy uıymdaryn retteý jáne qadaǵalaý agenttigi tóraǵasynyń orynbasary Alına Aldambergenniń aıtýynsha, Parlamentte «Saqtandyrý máseleleri boıynsha birqatar zań aktilerine ózgerister men tolyqtyrýlar engizý týraly» QR zań jobasy talqylanyp jatyr. Onda - jınaqtaýshy saqtandyrýdy damytý; saqtandyrý kelisimi boıynsha saqtandyrýshydan saqtandyrý syıaqysyn tóleýde saqtandyrý agenti qabyldap alǵan naqty aqshany qabyldaýǵa tyıymdy bekitý; saqtandyrý naryǵy ınfraqurylymynda: adjasterlardy, anderraıterlardy, sıýrveıerlardy odan ary damytý; saqtandyrý agentine qoıylatyn talaptardy kúsheıtý qarastyrylýda. Sondaı-aq, saqtandyrý statıstıkasynyń tolyqqandy bazasyn qurý; saqtandyrý tobyna qatysýshylardyń qyzmetiniń shoǵyrlandyrylǵan qadaǵalaýyn bekitý; saqtandyrý naryǵyna qatysýshylardyń kásibı birlestikteriniń qyzmetin retteý; táýelsiz aktýarııler ınstıtýtyn engizý kózdelip otyr. Alına Ótemisqyzynyń sózine qaraǵanda, normatıvtik- quqyqtyq aktilerdi jetildirýdiń qosymsha sharalary da júrgiziledi. Olardyń qatarynda - saqtandyrý rezervterin esepteý ádistemesiniń talaptaryn jáne saqtandyrý uıymdarynyń qyzmetinde dıstantsııalyq qadaǵalaý men taldaýdy júzege asyrý úderisterin jetildirý; saqtandyrýǵa qabyldanǵan apat táýekelderin baǵalaý bar. Sonymen qatar, táýekeldi qaıta saqtandyrýda jeke shegerýde dıfferentsııalandyrylǵan lımıtti engizý; ómirdi saqtandyrý boıynsha saqtandyrý uıymdarynyń ınvestıtsııalyq múmkindikterin nyǵaıtý bar.
