Parlamentte názikjandylardyń basqosýy ótti
ASTANA. 25 aqpan. QazAqparat / - Búgin Qazaqstan Respýblıkasy Parlamenti Májilisiniń depýtaty, áıel depýtattar tobynyń úılestirýshisi Maıra Aısına parlament qabyrǵasynda
halyq qalaýlylary bolyp júrgen, sondaı-aq buǵan deıingi shaqyrylymdarda Májilis depýtaty bolǵan jáne elordadaǵy memlekettik qyzmette basshylyq atqaryp júrgen bir top hanymdardyń basyn qosty.
Atalmysh shara Qazaqstan Respýblıkasy Parlamentiniń 15 jyldyǵy, Qazaqstan Respýblıkasynyń Táýelsizdigine 20 jyl tolýy men ótkizilgeli otyrǵan áıelder quryltaıynyń qurmetine arnaldy. «Elimizdiń eńse kóterip, memleketimizdiń nyǵaıyp, irgemizdiń bekı túsýine názik jandy sanalatyn áıelderdiń qosqan úlesi ólsheýsiz. Tarıh túpkirinen sóz tartpaǵannyń ózinde osy jıyrma jylda qazaqtyń qyzdary er kóterer júkti arqalaı bildi. Sol er minezdi qaısar qyzdar - Sizder dep tanımyz», - dedi jıyndy ashyp sóz sóılegen depýtat M.Aısına.
Saltanatty kesh barysynda «Eldiń batyr qyzdary», «Halyq qalaýlylary», «Mınıstr hanymdar», «Aýyr júk arqalaǵandar», «Halyq úni», «Bizdiń úmit» degen ataýlarmen aıshyqtalyp, qatysyp otyrǵan ár áıeldiń ózindik qasıetteri anyqtaldy. Eliniń batyr qyzdary bolyp Memlekettik syılyqtyń laýreaty, aqyn Farıza Ońǵarsynova, qoǵam qaıratkeri Záýre Qadyrova, memlekettik qyzmetkerler Raısa Sher men Lılııa Mýsına tanyldy. Olar Parlamenttiń ótken shaqyrylymdarynyń depýtattary. Farıza apaı men Záýre apaıdyń mereıli mereıtoılaryn eskergen sińlileri tartý-taralǵylaryn da umytpady. Farıza apaı saıasatker sińlilerine Shyńǵyshannyń shapqynshylyǵy kezindegi Otyrar qalasyndaǵy áıelderdiń erligin áńgimelep berdi de, «Memleket damýynda atqaryp otyrǵan eńbekterińe tabys, eldiń búgini men erteńin anaǵa tán júrekpen oılap júrgen júrekterińe alǵys tileımin. Parlamentte ótkir málimdemeler men depýtattyq saýaldar jasap otyrǵan qyzdarymyz, zań jasaǵan kezde de óz únderin tanytyp, óz talaptaryn qosyp otyr, sonyń arqasynda áleýmettik máseleler oń sheshimin taýyp keledi. Aldymyzda Táýelsizdiktiń 20 jyldyǵy, Prezıdent saılaýy, Islam konferentsııasyna tóraǵalyq t.b. kóptegen jaýapty sharýalar tur. Onyń negizi myna senderdiń qoldaryńmen atqarylady. Áıelder birikse, alynbaıtyn qamal joq. Senderge sol jolda tabys tileımin!», - dep aq batasyn berdi.
Merekeli, berekeli osy keshke Álem ártisi Aıman Musahodjaeva, Qazaqstannyń isker áıelderi qaýymdastyǵynyń prezıdenti Raýshan Sársembaevalar qatysyp halyqtyń únin jetkizdi.
Juldyz qyzdardyń jarqyraǵan keshinde kúıshi Murager Sársenbaev, Astana fılarmonııasynyń ánshileri Aızada Qopanova, Estaı Muqashev, Bıbigúl Januzaq jáne «Kantýs Nova» vokaldy kvarteti óner kórsetti.
