Parlamentte qyzmet etetinderdiń jalaqysy qansha ekendigi belgili boldy
ASTANA. QazAqparat - QR Parlamenti Májilisiniń depýtaty, «Aq jol» partııasy fraktsııasynyń múshesi Nurlan Jazylbekov Ortalyq kommýnıkatsııalar qyzmetinde ótken brıfıngte qansha jalaqy alatynyn aıtty.
«Depýtattardyń jalaqysy eshkimge qupııa emes. Qazir biz 500 myń shamasynda jalaqy alamyz. Bul Úkimettiń basqa múshelerimen, ulttyq kompanııa qyzmetkerlerimen salystyrǵanda onsha kóp emes. Degenmen, ony azyrqaný, menińshe, kúná. Óz jumysymyzǵa saı jalaqy alamyz», - dedi ol jýrnalısterdiń suraqtaryna jaýap berý kezinde.
Ol sondaı-aq, áriptesi Svetlana Jalmaǵambetovanyń usynysy týraly aıta kelip, onyń depýtattardyń emes, Parlamenttegi basqa qyzmetkerlerdiń jalaqysyn kóterý kerek degendi aıtqanyn túsindirdi. «S. Jalmaǵambetova búginde Joǵarǵy sot, Úkimet qyzmetkerlerimen birdeı qyzmet atqaryp, birdeı jaýapkershilik kóterip kele jatqan parlamenttiń basqa qyzmetkerleri týraly aıtty. Jalmaǵambetova ózi týraly aıtqan joq, depýtattardyń jalaqysy týraly aıtqan joq, ol basqa qyzmetkerler týraly aıtty. Iá, búginde Parlamenttegi qyzmetkerler úlken jumys atqarýda jáne olar eshkimnen kem emes. Sáıkesinshe, meniń oıymsha, olardyń jalaqysy da eńbegine saı bolýy kerek. Óıtkeni onda isteıtinderdiń kóbi jastar jáne kóbiniń 2-3 balasy bar. Búginde olardyń alatyn 100 myńnan sál ǵana asatyn jalaqysy eńbekterine saı emes», - dedi depýtat.
