Parlamentte bıznes-ahýaldy jaqsartý máseleleri talqylanýda
Mınıstrdiń aıtýynsha zań jobasy 6 kodeks pen 33 zańǵa ózgerister men tolyqtyrýlar engizýdi kózdeıdi. Osylaısha elde aqparatqa qoljetimdilikti jaqsartyp, birqatar kórsetiletin qyzmetti elektrondyq formatqa aýystyrý, rásimderdi qysqartyp, básekelestik ortany damytý josparlanǵan.
«Zańdy tulǵalarǵa tirkelgen jyljymaıtyn múlik nysandary boıynsha quqyq belgileıtin qujattardyń, aýyrtpalyqtardyń jáne sot talap aryzdarynyń bolýy týraly aqparatqa qoljetimdilikti qamtamasyz etý usynylady. Sondaı-aq, menshik ıesiniń derbes derekterin kórsetpeı, jyljymaıtyn múliktiń mártebesi týraly aqparatty ashýǵa ruqsat beriledi. Bul jyljymaıtyn múlik naryǵynda rásimdeýdi jeńildetip, kúmándi mámilelerdiń táýekelin tómendetedi. Jeke kredıttik bıýro úshin tutynýshylardyń tabıǵı monopolııalar sýbektileriniń aldyndaǵy boryshtary boıynsha aqparatqa qoljetimdilikti qamtamasyz etý usynylady. Mundaı aqparat memlekettik kredıttik bıýroǵa ǵana búgin de aı saıyn berilip jatyr», - dedi Rýslan Dálenov Parlament Májilisiniń jalpy otyrysynda.
Sonymen qatar mınıstr zańnyń kómegimen birqatar kórsetiletin qyzmetti elektrondyq formatqa aýystyrý kózdelgenin jetkizdi.
«Notarıattyq kýálandyrýdy talap etpeıtin jazbasha sharttarda mámilelerdi tirkeý kezinde belgi qoıý jumysyn elektrondyq formatqa aýystyrǵan abzal. Bul satý-satyp alý, syıǵa berý, jalǵa berý jáne basqa da mindetti notarıattyq tirkeýdi talap etpeıtin mámileler. Sondaı-aq, kásiporyndy elektrondyq memlekettik tirkeý kezinde bankte aǵymdaǵy shotty mindetti túrde onlaın túrde ashý usynysyn engizemiz. Bul rette, Nur-Sultanda, respýblıkalyq jáne oblystyq mańyzy bar qalalarda elektrmen jabdyqtaý jelilerine qosylý rásimin jeńildetý maqsatynda tehnıkalyq sharttardy berýge ótinishterdi qabyldaýdy tabıǵı monopolııalar sýbektileriniń saıttary arqyly elektrondyq túrde júzege asyrý kózdeledi», - dedi ol.
