Parlamentte barlyq fraktsııa ókilderi bar saraptamalyq-quqyqtyq komıtet qurý kerek
ASTANA. KAZINFORM – Parlamentte barlyq fraktsııa ókilderinen teń quralatyn saraptamalyq-quqyqtyq komıtet qurý qajet. Mundaı usynysty Konstıtýtsııalyq reformalar jónindegi komıssııasynyń 3-otyrysynda Májilis depýtaty Elnur Beısembaev jasady.
- Búgingi tańda biz qoldanystvaǵy negizgi zańǵa túzetýler engizý boıynsha ǵana emes, sonymen qatar Ádiletti Qazaqstannyń suranystaryna jaýap beretin jańa Konstıtýtsııasyny is júzinde qalyptastyryp jatyrmyz. Bul «Kúshti Prezıdenti – yqpaldy Parlament – esep beretin Úkimet» qaǵıdatyna negizdelgen bılik arhıtektýrasyn júıeli túrde qaıta qurý degen sóz. Ol búkil reformanyń naqty logıkasyn aıqyndaıdy. Búgingi Konstıtýtsııalyq komıssııanyń jumysy Parlamenttińk reformadan bastaý aldy. Óıtkeni, konstıtýtsııalyq ózgeristerdiń úlken bir baǵyty Parlamenttiń bolashaǵyna baılanysty. Barlyq fraktsııa jetekshileri, osyndaǵy biraz áriptesterimiz dál sol parlamenttik reformanyń jumys tobynyń qyzmetine belsene atsalysty. Jarty jyl boıy bolashaq Parlament qurylymy men quzireti tóńireginde naqty normalar ázirlep, usynystar berdi. Ár partııanyń saıası ustanymy men kózqarasy jumys tobynda naqty kórinis tapty, - dedi depýtat.
Onyń aıtýynsha, bir palataly Parlament qurý el bolashaǵy úshin taǵdyrsheshti, óte qajetti sheshim. Ol - saıası jaýapkershilikti naqtylaý, partııalardyń ınstıtýtsıonaldy rólin kúsheıtý.
- Bul turǵyda Prezıdenttiń bir palataly Parlamentke kóshýdi usynǵany óte oryndy jáne de ýnıtarly memleketter úshin dál osydaı model eń tıimdi bolyp sanalady. Zań shyǵarý protsesi jyldam, ashyq jáne túsinikti bolady. barlyq zań Parlamentte úsh oqylymnan ótedi, ıaǵnı alǵashqy eki oqylym ashyq talqylansa, úshinshi oqylymda onyń Konstıtýtsııaǵa, elimizdiń ulttyq zańdaryna sáıkestigi pysyqtalady. Osy tusta lobbı, jeke múdde jáne memlekettik saıasatqa kereǵar usynystarǵa tolyǵymen tosqaýyl qoıamyz. ıAkı, arnaıy engizilip otyrǵan úshinshi oqylym negizgi jáne kásibı saraptamany arttyratyn mańyzdy qadam bolady. Osyǵan baılanysty bolashaq Quryltaıdyń partııalyq tizim arqyly jasaqtalýy jeke tulǵalarǵa emes saıası baǵdarlamalar men ıdelogııalarǵa negizdelgen ınstıtýtsıonaldyq jaýapkershilikti kúsheıtedi, - dedi Elnur Beısembaev.
Osy oraıda ol Parlamentte barlyq fraktsııa ókilderinen teń quralatyn jáne olardyń barlyǵyn qamtıtyn turaqty saraptamalyq-quqyqtyq komıtet qurýdy usyndy.
- Menińshe, bul bastamany osynda Parlamenttik fraktsııa basshylary da qoldaıdy dep senemin. Qoǵamda bolashaq Parlament depýtattarynyń sany boıynsha da ártúrli pikir bar. Degenmen, jumys tobynyń 145 depýtat bolýy qajet degen sheshimi búgingi saıası ahýalǵa da, qoǵamnyń suranysyna da naqty saı, - dedi Májilis deptýtaty.
Aıta keteıik, Konstıtýtsııaǵa Quryltaı depýtattary mınıstrlerdi laýazymynan bosatatyn norma engizilýi múmkin.