Parlamentte áıelder úlesi 30 paıyzǵa deıin jetedi degen úmittemiz - R. Sársembaeva
ASTANA. QazAqparat - Qazaqstannyń isker áıelder qaýymdastyǵy bıylǵy Parlament pen barlyq deńgeıdegi máslıhattar saılaýynyń nátıjesinde zań shyǵarýshy bıliktegi áıelder úlesi 30 paıyzǵa jetedi dep úmittenedi. Bul týraly búgin Ortalyq kommýnıkatsııalar qyzmetinde ótken brıfıngte Qazaqstannyń isker áıelder qaýymdastyǵynyń prezıdenti Raýshan Sársembaeva málim etti.
«Bıliktiń zań shyǵarýshy organynda, memlekettik atqarýshy organdarda názik jandylardyń úlesi 30 paıyzǵa sál jetpeıdi. Meniń oıymsha, bul búgingi saılaý úderisiniń enshisindegi mindet. Sondyqtan da, biz bıylǵy saılaý nátıjesinde áıelderdiń úlesi 30 paıyzǵa deıin jetedi degen úmittemiz», - dedi R.Sársembaeva. Onyń aıtýyna qaraǵanda, elimizdegi genderlik saıasatqa qatysty dınamıka jyl saıyn jaqsaryp keledi. Máselen, besinshi shaqyrylǵan Parlament Májilisindegi 107 depýtattyń 28-i áıelder bolyp, bul 26,2 paıyzdy quraǵan. Al 2007 jyly saılanǵan Májilistegi áıelder úlesi 19,5 paıyz bolǵan edi.
Sonymen qatar, qaýymdastyq basshysy saıası partııalardyń genderlik máselesindegi róline nazar aýdardy. Onyń aıtýynsha, bul baǵytta «Nur Otan» partııasy kóshbasshy bolyp, basqalaryna qaraǵanda áıelder úlesin kóbirek usynyp otyr.
«Nur Otan» partııasy birinshi orynda tur, olar 30 áıel usynǵan, 23,6 paıyzdy quraıdy. Odan keıingi orynda Qazaqstannyń kommýnıstik partııasy 22 kandıdattyń 4-eýi áıel - bul 18,8%. «Aq jol» partııasy 35 kandıdattyń altaýyna áıelderdi tartty, 17,1%. «Birlik» partııasynyń 8 kandıdatynyń 1-eýi áıel - 12,5%. Al «Aýyl» partııasynda 19 kandıdattyń ekeýi áıel - 10,5%», - dedi qaýymdastyq jetekshisi.
Onyń aıtýynsha, Ortalyq saılaý komıssııasynyń málimetterine qaraǵanda, barlyq deńgeıdegi máslıhattar saılaý boıynsha 2852 áıel kandıdattar tirkelgen, bul 26,3 paıyzdy quraıdy. «Eger osy áıelderdiń barlyǵy saılaýdan súrinbeı ótse, onda barlyq deńgeıdegi máslıhattardaǵy názik jandylar úlesi 26 paıyzdy quraıtyn edi. Qazir bul kórsetkish 17 paıyz», - dedi ol.
