Parlamentshiler halyqtyń reprodýktıvtik densaýlyǵy men genderlik teńdik máseleleri jaıynda pikir almasady
ALMATY. Qazannyń 27-si. QazAqparat - Erteń, qazannyń 28-i kúni Almaty qalasynda Qazaqstan topyraǵynda tuńǵysh ret genderlik teńdik pen áıelder quqyǵyn qorǵaý máseleleri boıynsha ortalyqazııalyq eki kúndik parlamenttik basqosý bastalady. Bul úlken jıynda halyqtyń reprodýktıvtik densaýlyǵy men genderlik teńdik máseleleri jaıynda áńgime bolady,
dep habarlaıdy QazAqparat.
Forýmǵa Májilis Tóraǵasynyń orynbasary Jánibek Káribjanov, Májilistegi Áleýmettik-mádenı damý komıtetiniń tóraıymy Dınar Nóketaeva, depýtattar Elena Tarasenko, Serik Ospanov, Darıa Klebanova, Shavhat Ótemisovter qatysady.
Atalǵan halyqaralyq basqosýda Halyqtyń qonystanýy men damytý jónindegi Azııalyq forým tóraǵasynyń orynbasary, QR Parlamenti Májilisiniń depýtaty Aıtkúl Samaqova baıandama jasaıdy dep josparlanǵan.
Almatydaǵy basqosýǵa Shyǵys Eýropa ókilderi, óńirlerdiń parlamenttik jelileri men Azııa-Tynyq Muhıt aımaǵynan ókilder shaqyrylyp otyr. Sondaı-aq, Qyrǵyzstan, Ózbekstan, Tájikstan, Túrikmenstan jáne Qazaqstannyń parlamenttik delegatsııalary qatysady dep kútilýde.
Kezdesýde negizinen genderlik máselelerge jáne Ortalyq Azııa men Shyǵys Eýropa óńirinde HDHK-men olardyń baılanysyna nazar aýdarylatyn bolady. Qyzdar men áıelderge bilim berý, genderlik teńdik jáne áıelderdiń quqyqtaryn qorǵaýdy qamtamasyz etý jónindegi zańnama, jastardyń urpaq reprodýktıvti densaýlyǵyn qorǵaý jáne óńirdegi elderdiń ulttyq saıasaty sheńberinde genderlik bıýdjet bólý sııaqty naqty taqyryptardy qamtıdy.
