Parlamentshiler elordadaǵy óndiris oryndarynda jumyspen qamtý baǵdarlamasy qalaı júzege asyp jatqanyna basa kóńil aýdardy

ASTANA. 6 sáýir. QazAqparat - «Talgo» jolaýshylar vagondaryn shyǵaratyn «Tulpar Talgo» BK JShS zaýytynda bolǵanda QR Parlamenti Májilisiniń Qarjy jáne bıýdjet komıtetiniń tóraıymy,ekonomıka ǵylymdarynyń doktory Gúljan Qaraǵusova otandyq BAQ ókilderine suhbat berdi.

Depýtat osy zaýytta bizdiń klımatymyzǵa, temir joldarymyzǵa beıimdelgen vagondar qurastyrylyp shyǵarylyp jatqanyn, sonymen shektelip qalmaı, bizdiń temir joldarda paıdalanýǵa berilgen «Tulpar» poıyzynyń 5-7 jyl boıǵy tájirıbesin eskere otyryp, aıtylǵan syndar men pikirler negizinde birqatar kemshilikter joıylǵanyn aıtty.

«Bul bizdi qýantyp otyr. Óıtkeni bul kásiporyn erkin ekonomıkalyq aımaq (EEA) ishinde, EEA-y jeńildikke ıe bolǵan soń, baǵa saıasaty boıynsha barlyq ónimderi básekege tipten qabiletti. Elimizdiń bas qalasynyń óndiristik aýmaǵynda básekege qabiletti ónim shyǵaratyn osyndaı úlken ınnovatsııalyq aımaq bar ekeni qýantyp otyr. Munyń syrtynda, bul vagondardy satýǵa shyǵarý naryǵy qamtamasyz etilgen. Óıtkeni bizdiń elimizdegi barlyq vagondar parkin jańartýymyz kerek. Osy oraıda biz shetelderden, onyń ishinde TMD elderinen túsip jatqan tapsyrystardy almaı otyrmyz. Mundaı tehnologııa tipti Reseıdiń ózinde de joq»,- dedi Gúljan Janpeıisqyzy.

G. Qaraǵusova elordamyzdaǵy óndiris oryndaryn aralaǵan kezde Májilis depýtattary úlken áser alǵanyn málimdedi. Ózi Memlekettik qarajatty tıimdi paıdalaný jónindegi komıssııanyń tóraıymy retinde jaqynda jumyspen qamtý baǵdarlamasy týraly máseleni qarastyrǵanyn jetkizdi.

Parlamentshiler elordalyq óndiris oryndarynda bolǵanda, jumyspen qamtý baǵdarlamasy qalaı júzege asyp jatqanyna basa kóńil aýdardy. Máselen, Temir-beton buıymdaryn shyǵaratyn «Maqsat ABK» JShS-iniń zaýytynda bolǵanda, qalalyq jumyspen qamtý departamenti osy óndiris ornyna 30 jumysshyny jiberý jóninde kelisim jasalǵynyn estip bildi. «Bul málimetke bizdiń kóńilimiz kóterilip qaldy. Osy 30 jumysshy zaýytta tájirıbeden ótedi, alty aı boıyna olarǵa memleket qarjy tólep turady, sodan keıin turaqty jumysqa qabyldanady. Mundaı máseleni «sendvıch - panelin» óndiretin «Krovlıa NS» JShS-iniń zaýytynda da kezdestirdik. Olardyń da basty máselesi - bilikti maman tabý. Soǵan oraı biz olarǵa jumyspen qamtý baǵdarlamasy bar ekenin, sol arqyly kerek mamandardy alýǵa bolatynyn aıttyq»,-dedi Májilistiń salalyq komıtetiniń tóraıymy.