Parlamentke jer qoınaýy týraly Kodeks jobasy engiziledi - Jeńis Qasymbek

ASTANA. QazAqparat - 2017 jyly Parlamenttiń qaraýyna Jer qoınaýy týraly Kodekstiń jobasy engiziledi. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek málim etti.

«Geologııalyq barlaýǵa ınvestıtsııa tartý úshin bolashaqta biz ınvestıtsııalyq naryqta básekelesý múmkindigine ıe bolyp, qajetti tartymdy jaǵdaıdy qurýymyz qajet. Ol úshin Ekonomıkalyq yntymaqtastyq jáne damý uıymy (EYDU) belsendi yntymaqtasýdamyz, osy rette tıisti zertteýlerdi júrgizýdemiz. EYDU taldaýy nazar aýdaratyn eń ózekti problemalyq aımaqtardy anyqtady. Bul problema zańnamalyq negizben, normatıvti-quqyqtyq bazamen, geologııalyq aqparattyń sapasymen jáne qoljetimdiligimen, sondaı-aq basqa da ózekti máselelermen baılanysty. Atalǵan uıym usynystaryn oryndaý men «Jer qoınaýy jáne jer qoınaýyn paıdalaný týraly» Kodeksti qabyldaý Qazaqstannnyń ınvestıtsııalyq tartymdylyǵyn jaqsartady»,-dedi J. Qasymbek.

Onyń sózine qaraǵanda, bul máselelerdi sheshý úshin qoldanystaǵy zańnamany reformalaı otyryp, jeke ınvestorlar úshin tartymdy jaǵdaıdy jasaý qadamy eskerilip otyr. Ekinshiden, geologııalyq barlaý jumystarynyń eń bastapqy kezeńderinde memlekettik qarjylandyrýdy arttyrý, úshinshiden, sońǵy býyndy tehnologııalardy paıdalaný arqyly barlaý jumystarynyń sapasyn kóterý sekildi sharalar qamtylyp otyr.

Mınıstrdiń aıtýynsha, atalǵan Kodeksti qabyldaý Qazaqstannyń ınvestıtsııalyq tartymdylyǵy reıtıngin arttyrýǵa, óndirý kólemin 10-13 paıyzǵa jáne ІJÓ-niń 2-2,5 paıyzǵa ósýin qamtamasyz etpek.

«Kodeks jobasyn Májiliske 2017 jyldyń maýsymynda engizý josparlanyp otyr»,-dedi J. Qasymbek.

Belgili bolǵandaı, zań jobasy 2018 jyldan kúshine enedi dep josparlanýda.