Parlamentke usynylatyn zań jobalary sapasyna qatysty problema ózekti bolyp otyr - N. Nyǵmatýlın
ASTANA. 29 maýsym. QazAqparat - Búgin Parlament sessııasynyń jabylýyna arnalǵan palatalardyń birlesken otyrysynda qorytyndy baıandama jasaǵan Májilis tóraǵasy Nurlan Nyǵmatýlın Úkimetten kelip túsetin zań jobalarynyń sapasyn synǵa aldy.
Óz sózinde spıker Parlament pen Úkimet arasyndaǵy syndarly yntymaqtastyqty baǵalaı kele, atqarýshy bıliktiń jumysyndaǵy jekelegen kemshilikterdiń oryn alyp otyrǵanyna da nazar aýdardy. Onyń aıtýynsha, búgingi kúni Parlamentke usynylatyn zań jobalar sapasyna qatysty problema ózekti máselege aınalyp otyr. «Úkimet búgingi kúni aýqymdy uıymdastyrýshylyq, qarjylyq jáne basqa da resýrstarǵa ıe. Osylaı bolǵandyqtan da, bizdiń oıymyzsha zań jobasynyń sapasyna tııanaqtylyqpen qaraý kerek. Al ázirshe zań jobalaryn qaraý barysynda Májiliste de, Senatta da jobanyń mátinderin zań tehnıkalaryna sáıkes keltirýge ǵana emes, onyń mazmundyq turǵysyna da baǵyttalǵan aıtarlyqtaı túzetýler men ózgerister engizýge týra keledi», - deıdi Májilis tóraǵasy.
Sonymen qatar, N. Nyǵmatýlın jyl saıyn Parlamenttiń sessııasy aıaqtalar tusta Úkimettiń mańyzdy zań jobalaryn usyný jaǵdaıy qaıtalanatynyn aıtyp ótti. «Árıne, biz bundaı qadammen kelisken joqpyz, keleshekte de sondaıǵa kelisim bermeımiz. Mundaı qubylystyń zań shyǵarmashylyǵy jumysyna jaǵymsyz áser etetinin moıyndaýymyz kerek. Sondyqtan da, biz aldaǵy ýaqytta álgindeı keleńsizdikti boldyrmas úshin birlese sharalar qabyldaýymyz kerek», - deıdi N. Nyǵmatýlın.
