Parlamentke Tsıfrlyq kodeks jobasy qashan engiziledi
Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Asqar Jambakın Tsıfrlyq kodeks jobasyna qatysty túsinik berdi, dep habarlaıdy Kazinform.
Onyń aıtýynsha, Qazaqstan Úkimetiniń 2024 jylǵa arnalǵan zań jobalaý jospary aıasynda Tsıfrlyq kodeksiniń jobasyn ázirleý bekitilgen. Bul qujat jobasy Ádilet mınıstrligine keler jyldyń maýsym aıynda, al Parlamentke qyrkúıek aıynda engizilmek.
«Bul qujattyń bastapqy nusqasyn daıyndadyq. Ony 2024 jyly Májiliske engizý mindetin belgiledik. Qujat derekterdi, baılanystardy, memlekettik qyzmetterdi, kıber jáne aqparattyq qaýipsizdikti, elektrondy qujattar men elektrondy tsıfrlyq qoltańbany retteý boıynsha qoldanystaǵy zańnamany biriktiredi. Atap aıtqanda, qazir tsıfrlyq qujattardy engizip jatqanymyz belgili. Máselen, osy qujattar boıynsha basqa qalaǵa kólikpen nemese poıyzben emin-erkin barýyńyz úshin birneshe zańdarǵa ózgertýler engizý kerek. ıAǵnı osy salada qaıshylyqtardy boldyrmaý úshin bul prıntsıpterdi Tsıfrlyq kodeks aıasynda retteý usynyldy. Tsıfrly derekqorlardaǵy siz týraly aqparat basqa zańdardaǵy talaptarmen úılestirilýi tıis. Adamnyń saparlaýynda nemese basqa da áreketterinde eshqandaı kedergiler bolmaýy kerek. Jol polıtsııasy jáne basqa da organdar qaǵaz nusqadaǵy qujattardy talap etpes úshin tıisti normalar atalǵan kodekste eskeriledi», - dedi A.Jambakın Ádilet mınıstrliginde tilshiler suraǵyna jaýap bere otyryp.
Bul rette ol Tsıfrlyq kodekste barlyq saladaǵy osy tektes máselelerdi sheshýge baǵyttalǵan qadamdar qamtylatynyn aıtty.
«Jeke derekterdi qorǵaý týraly zań da osy qujat aıasynda qamtylady. Qazir salalyq zańnamada bar normalardyń bári tıisti deńgeıde Tsıfrlyq kodekske kóshirilip, zamanaýı talaptarǵa saı keltiriledi. Jasandy ıntellekt boıynsha tıisti retteý is-sharalary eskerilmegen. Sondyqtan bul másele atalǵan kodekste qarastyrylady», - dedi vıtse-mınıstr.
Aıta keteıik, bıylǵy Joldaýynda Memleket basshysy Úkimetten, sarapshylar qaýymynan, Parlament depýtattarynan birtutas salalyq qujat ázirleý máselesimen aınalysýdy surady.
