Parlamentke tájirıbeli azamattar saılanǵanyn qalaımyn - Bekbolat Tileýhan
«Qazir daǵdarysty, ekonomıkalyq qana emes, rýhanı daǵdarysty bastan keship otyrǵan kezde, biz - álemdik qaýymdastyqtyń bir pushpaǵymyz, sondyqtan da der kezinde shara qoldanbasa bolmaıdy. Sezd zamananyń betburysyna, aýanyna oraı, shara qylý jáne ony utymdy túrde jedel jasaý mindet bolǵandyqtan ótip jatyr. Biraq men bir nársege senemin, bizdiń el, halqymyz almaǵaıyp kezeńderde, daǵdarys kezeńderinde ózi jınaqtalyp alady. Biz - Aqtaban shubyryndy, Alqakól sulamadan ótken halyqpyz. Qandaı da kezeń bolsa, erte alǵan erdiń artynan erip kelgen elmiz, yntymaq arqyly yrysqa, birlik arqyly berekege jetkenbiz, amandyq bolsa, budan da ótemiz dep oılaımyn», - dedi ol jıyn sońynda tilshilerge bergen suhbatynda.
QR Parlamenti Májilisiniń 4-shi shaqyrylymynda depýtat bolǵan B.Tileýhan myrza, májiliste halyq sózin sóıleıtin saýatty azamattardyń kelgenin qup kóretindigin jasyrmady.
«Jalpy zań shyǵarý ońaı sharýa emes, qoǵam tynysyn tereń sezinetin, zańgerler jáne tájirıbeli azamattar saılanǵanyn qalaımyn», - dep túıdi sózin B. Tileýhan.
Aıta keteıik, «Nur Otan» partııasynyń kezekten tys sezinde partııalyq tizim boıynsha belgili boksshy Gennadıı Golovkın men álem jáne olımpıada chempıondary Serik Sápıev, Ilıa Ilın endi. Sonymen qatar, elimizdiń tanymal ánshileri Qaırat Nurtas pen Janar Doǵalova, Aıman Musaqojaevalar ótti. Birqatar mınıstrler men ákimder, ulttyq kompanııa basshylary da partııalyq tizimge engen. Máselen, mınıstrler arasynda Arystan Muhamedıuly, Baqyt Sultanov, Úkimet basshysynyń orynbasary Darıǵa Nazarbaeva, QR Prezıdenti Ákimshiliginiń Basshysy Nurlan Nyǵmatýlınder de bar. Oblys ákimderi, solardyń ishinde Berdibek Saparbaev, Sergeı Kýlagın, Alık Aıdarbaev, Amandyq Batalov, Danıal Ahmetovter endi.
