Parlamentke taıaýda ÚEU týraly zań jobasy engiziledi - Qazaqstannyń Azamattyq alıansy
Bul týraly búgin Astanada ótken baspasóz máslıhatynda atalǵan alıanstyń prezıdenti Nurlan Erimbetov málim etti.
«Biz jaqyn arada Parlamenttiń qaraýyna «Úkimettik emes uıymdardyń qyzmeti máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasyn engizemiz. Osy kúnge deıin ÚEU-lar memlekettik áleýmettik tapsyrys arqyly, tenderlermen ómir súrip keldi. Ákimder, mınıstrlikter tenderlerdi jarııalap, taqyryptardy ózderi belgileıdi. Atap aıtqanda, memlekettik organdar tapsyrysty kim oryndaıtyndyǵy jaıynda talap qoıatyndyǵy»,-dedi N. Erimbetov.
Onyń sózine qaraǵanda, kezinde 27 myń ÚEU ashyldy, alaıda olardyń kóbi birkúndik uıymdar bolǵandyqtan jáne konkýrstarǵa qatysýǵa qaýqarsyzdyq tanytqannan keıin jabylyp qaldy. Búginde olardyń sany birneshe myńdy ǵana qurap otyr.
«Bul uıymdar tirkeýde turǵanymen, keıbiri eshqandaı jumystar atqara almaı otyr. Osy zań jobasynda qarjylandyrýdyń úsh túri eskerilýde. Bunda tek memlekettik áleýmettik tapsyrys qana emes, sonymen qatar ÚEU-lar úshin syıaqy jáne granttyq qarjylandyrý qarastyrylǵan. ıAǵnı bul qarjyny biz ózimiz basqaratyn bolamyz. Búginde taqyryptardy sheneýnikter belgileýde. Biz qoǵam úshin mańyzdy taqyryptardy qoǵammen talqylap, ózekti máselelerdi anyqtaǵymyz keledi»,-dedi alıans prezıdenti.
"Elimizde múmkindigi shekteýli adamdardyń birlestikteri jáne basqa da uıymdar bar. Biz qarjyny osy birlestikterge bólemiz. Óıtkeni olar ózderiniń baǵytynda ádil jumys istep jatqandardy jaqsy biledi. Osy oraıda bólingen bul qarjyny ózderiniń arasynda durys úlestire alady. Árıne, qarjynyń maqsatty jumsalýyna tıisti qadaǵalaý jasalady".
N. Erimbetovtiń aıtýynsha, ákimderdiń reıtıngine úkimettik emes uıymdarmen jumysyn engizý qarastyrylyp otyr. Onyń paıymynsha, óńir basshylarynyń ÚEU-men jumysy qoǵam ómiri úshin mańyzdy.
