Parlamentke ótý mejesin qazirgi bes paıyz deńgeıinde qaldyrý kerek - Prezıdent

QYZYLORDA. KAZINFORM – Jańa Parlament eshkimniń qamqorlyǵyna, qadaǵalaýyna muqtaj emes ekenine senimdimin. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev málim etti.

- Qazaqstan halqy Assambleıasynyń arnaıy kvotasy da alynyp tastalady. Osy ustanymmen jastarǵa, áıelder men erekshe qajettiligi bar azamattarǵa arnalǵan kvotany qosa alyp tastaýdy usynǵandar boldy. Biraq, bul – múlde basqa másele. Bul kvota – áleýmettik ádildik qaǵıdatynyń aıqyn kórinisi, sondaı-aq elimizdegi barlyq qoǵamdyq-saıası ókilderdi eskeretin mańyzdy talap. Sol sebepti, osy kvotalardy ózgerissiz saqtap qalýdy usynamyn, - Qasym-Jomart Toqaev.

Sonymen qatar Prezıdent, partııalardyń Parlamentke ótý mejesin qazirgi bes paıyzdan jeti paıyzǵa qaıtarý qajet degen pikir aıtylǵanyn jetkizdi.

- Bul ereje kezinde Ulttyq qoǵamdyq senim keńesiniń bastamasymen qabyldanǵan bolatyn. Bes jyl buryn engizilgen osyndaı ózgerister saılaý zańnamasyn jaqsartýǵa edáýir septigin tıgizdi. Mejeni tómendetý arqyly Parlamenttegi iri saıası kúshterdiń ústemdigin azaıtyp, partııalar arasyndaǵy básekeni kúsheıtýdi maqsat tutqan edik. Búgingi tańda osy normanyń tıimdiligine kózimiz jetti. El tarıhynda alǵash ret Májiliske alty partııanyń ótýi – sonyń aıqyn dáleli. Sondyqtan men bes paıyzdyq mejeni qaldyrǵan jón dep sanaımyn, - dedi Memleket basshysy.

Aıta keteıik, Prezıdent jańa Parlamentke «Quryltaı» degen ataý berýdi usyndy.