Parlamentke, máslıxatqa isker azamattar kelýi kerek - Z. Qabyldınov
ASTANA. QazAqparat - Parlamentke, máslıxatqa isker azamattar kelýi kerek. Bul týraly tarıh ǵylymdarynyń doktory, professor, L.N. Gýmılev atyndaǵy Eýrazııa ulttyq ýnıversıtetiniń professory, «Eýrazııa» gýmanıtarlyq ǵylymı zertteýler ortalyǵynyń dırektory Zııabek Qabyldınov málim etti.
Onyń oıynsha, qazirgi ýaqytta Parlament Májilisiniń kezekten tys saılaýyn ótkizý óte ózekti bolyp otyr.
«Qazaqstan Respýblıkasynyń azamaty retinde, Qazaqstannyń patrıoty retinde, úkimettik emes uıymnyń ókili retinde, professor retinde men tolyq osy bastamaǵa qosylamyn. Ne sebepten osyndaı qajettilik týdy? Birinshiden, álemdegi jaǵdaı ózgerdi. Geosaıası baǵytyn alsańyz da, ekonomıkalyq-qarjy baǵytyn alsańyz da, jaǵdaı kúrdelenip ketti. Búgin ǵana ınternet resýrstardy qarasaq, munaıdyń barreli 30 dollardan tómendep ketken. Bul búkil álemde daǵdarystyń jańa qarqyny bastalady degendi bildiredi. Sondyqtan májilis depýtattarynyń 3 fraktsııanyń ókilderi parlamentte ýaqytynan tys taratý kerek, sonymen qatar máslıxat depýtattarynyń saılaýyn birge ótkizý qajet degen usynystaryna tolyǵymen qosylamyn», - deıdi ol.
«Eń birinshiden, bizdiń máslıxattaǵy depýtattar, májilistegi depýtattar xalyqtan senim alyp, aldymyzda turǵan «Ult Josparyn» júzege asyrýǵa, sonymen qatar álemniń 30 damyǵan memleketteriniń qataryna ený týraly Elbasy tapsyrmasyn iske asryýǵa alańsyz kirise alady.
Parlamenttiń quramy da ózgeredi. Men keıde ózime suraq qoıamyn, myna máslıxattarda qandaı azamattar otyrýy tıis dep. Eń birinshi - isker azamattar kelýi kerek. Ekinshiden, patrıottyq rýxy óte joǵary adamdar qajet. Úshinshiden, elim, jerim dep, búkil bilimin, búkil kúshin, alǵan tájirıbesin eline xalqyna aıanbaı jumsaıtyn eńbekqor azamattar kelýi tıis. Sonda ǵana biz ekonomıkalyq daǵdarystan shyǵa alamyz. Máslıxat depýtattyǵyna osyndaı azamattar keletinine senemin», - dep atap ótti Z. Qabyldınov.
Professordyń málim etkenindeı, saılaýǵa neǵurlym kóp partııa qatyssa, soǵurlym jaqsy múmkinshilikter ashylady.
«Jańa partııalar, jańa kózqarastar, jańa ıdeıalar keledi. Odan tek qazaqstandyqtar utady», - dep túıdi sózin ortalyq dırektory.
