Parlamentke qosymsha bılik berilip, saılaýdy barynsha ádil ótkizý kerek - Aldan Smaıyl

ASTANA. QazAqparat - QR Parlament Májilisiniń V shaqyrylym depýtaty, memleket qaıratkeri, jazýshy Aldan Smaıyldyń oıynsha, Parlamentke burynǵy bir mandatty depýtattardy qaıtarý qajet, dep habarlaıdy QazAqparat tilshisi.

Aldan Smaıyldyń aıtýynsha, prezıdenttik bılikten birte-birte parlamenttik bılikke kóshý bastamasy buryn da bolǵan. Alaıda ol kezde «reformaǵa áli daıyndyq qajet, ekonomıkany kóterý kerek, qoǵamnyń ózi soǵan laıyqty bolýy tıis» degen ýájder kóp aıtyldy.

«Endi, qazirgi kezde osylardyń barlyǵy júzege asqan sııaqty. Soǵan baılanysty bılikti bólisetin ýaqyt ta jetti. Men óz basym búgingi bastamany qostaımyn. Biraq sonyń barlyǵy durys jumys istep ketýi úshin bir nárse kerek. Ol - saılaýdyń barynsha ádil bolýy. Halyq ózine unaıtyn, óziniń sózin sóıleıtin partııanyń ókilderin Parlamentke kóbirek ákelýi tıis. Eger burynǵysha barlyǵy bir partııanyń atynan saılanyp, Parlamentte kópshilik daýys solarda bolsa, onda bıliktiń ókilettilikteri durys bólinbeı qalady. Sondyqtan saılaýdy barynsha ádil ótkizý kerek. Bul - bir. Ekinshiden, bılik ókilettilikterin bólgennen keıin Parlamentke bir mandatty depýtattardyń kelýin qarastyrý kerek edi. Bir mandat degenimiz, eshqandaı partııada tirkelmegen, ózin-ózi usyna alatyn adam, ony xalyq saılap shyǵarady. Bul bizde bolǵan. Biraq keıingi kezderi alynyp tastaldy. Máselen, kórshi Reseıde ondaı norma bar. Pýtınniń jeke tapsyrmasy boıynsha bir mandatty depýtattar burynǵydan da kóp saılandy», - dedi Aldan Zeınollauly QazAqparat tilshisine bergen suxbatynda.

Sondaı-aq ol Konstıtýtsııanyń 26-babyndaǵy ózgeristerge úzildi-kesildi qarsy ekenin jetkizdi.

«Ata zań - zańdardyń atasy, sol arqyly barlyq normalar dúnıege keledi. Endeshe eń basty Zańda «árkim» degen ekiudaı uǵym esh ýaqytta bolmaýǵa tıis. Prezıdenttiń keshegi sheshimi bul naǵyz durys sheshim boldy», - dep atap kórsetti jazýshy.

Aıta keteıik, bılik tarmaqtary arasynda ókilettiliktedi qaıta bólý bastamasy aıasynda Prezıdenttiń birqatar ókilettilikterin Úkimet pen Parlamentke berý kózdelgen. Sonyń ishinde respýblıkalyq bıýdjetti bekitý de bar. Úkimet arnaıy komıssııany da, bıýdjetti atqarý tártibin de ózi bekitedi. Al Parlament el qazynasyn jumsaýdy baqylap otyrady.

Osyǵan qatysty arnaıy zań jobasyn osy aıda Parlamenttiń qaraýyna engizý kózdelip otyr.

Al Konstıtýtsııanyń 26-babyn Prezıdenttiń ózi ózgerissiz qaldyrýdy usyndy.