Parlamentke enetin partııalarǵa qaralǵan qarajat qalaı bólinedi

ASTANA. QazAqparat – QR Premer-Mınıstriniń orynbasary – Qarjy mınıstri Erulan Jamaýbaev Parlamentke engen partııalarǵa qarastyrylǵan qarajatqa qatysty túsinik berdi, dep habarlaıdy QazAqparat tilshisi.

Búgin Senatta ótken baspasóz máslıhatynda tilshiler mınıstrden 11,8 mlrd teńge partııalarǵa qalaı bólinetinin surady.

«Jaqyn arada 2023 jylǵa arnalǵan bıýdjetti naqtylaý boıynsha Parlamentke baramyz. Bul turǵyda Ortalyq saılaý komıssııasynyń derekteri aıasynda osy bıýdjetti qaıta qarap, partııalar arasynda bólemiz. Zań boıynsha bul qarajatty Parlamentke fraktsııa bolyp engen partııalar alady», - dedi E. Jamaýbaev.

Osy oraıda mınıstr jınaǵan daýys sanyna qaraı tıisti ádisteme bar ekenin jáne osy daýystar boıynsha qarjylandyrý júrgiziletinin aıtty.

«Máselen, 2022 jyly shamamen 8,5 mlrd teńge qarastyrylǵan edi. Onyń basym bóligi Amanat partııasyna, 1 mlrd teńgege jýyǵy Aq jolǵa, sondaı-aq 800 mln teńge Qazaqstan halyq partııasyna bólindi», - dedi E. Jamaýbaev.