Parlamentke bıznes úshin ákimshilik kedergilerdi azaıtý turǵysynda zań jobasy engiziledi
ASTANA. QazAqparat - Jaqynda Parlamentke bıznes úshin ákimshilik kedergilerdi azaıtý turǵysynda zań jobasy engizilmek. Jańa Zań qabyldanǵannan keıin memlekettik organdar jańa ruqsattardy óz betinshe engize almaıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Qazaqstan Respýblıkasynyń Óńirlik damý vıtse-mınıstri Serik Jumanǵarın málim etti.
Bıznes úshin ákimshilik kedergilerdi azaıtý máselesine toqtalǵan vıtse-mınıstr «Ótken jyly Ulttyq kásipkerler palatasy quryldy. Ol qazirgi ýaqytta Úkimettiń senimdi seriktesine aınalyp otyr. Máselen, osy jyly Memleket basshysynyń tapsyrmasyna sáıkes, Ulttyq kásipkerler palatasymen birlese otyryp, bıznestiń damýyna kedergi keltiretin normalardy anyqtaý jáne olardy alyp tastaý turǵysynda zańnamaǵa tekserý júrgizildi. Osy jumystyń nátıjesinde jaqyn arada Parlamentke «Ruqsattar men habarlamalar týraly» Zań jobasy engiziletin bolady. Bul Zań 2013 jyly barlyq ruqsattarǵa tolyq tekserý júrgizý negizinde jáne ruqsat berý júıesin reformalaý aıasynda ázirlendi»,- dedi.
S.Jumanǵarınnyń aıtýynsha, bul zań kásipkerlerge jańadan engiziletin negizsiz ruqsattarǵa tosqaýyl qoıatyn bolady. Ruqsatnamalar synyptar men qaýiptilik kategorııalaryna bólinip, onyń tolyq tizbesi zańnamanyń negizgi quraly bolyp tabylady.
«Zańdy qabyldaǵannan keıin memlekettik organdar óz betinshe jańa ruqsattardy engize almaıdy. Sondyqtan olar ruqsatnamalardy engizý qajettigin dáleldep, kásipkerler úshin ekonomıkalyq saldaryn esepteý kerek. Tek sodan keıin ǵana ruqsat berý zańda kórinis alady», - dedi vıtse-mınıstr.
Zań jobasy boıynsha barlyǵy 758 qujat bekitiledi, onyń ishinde 717-si ruqsat berýler, al 35-i habarlama bolyp tabylady.
