Parlamentarızmniń jumysyn jetildirý onyń ómirsheńdiginiń mańyzdy atrıbýty - S. Aqylbaı
ASTANA. 19 sáýir. QazAqparat - Búgin Parlament Senatynda «Qazirgi zamanǵy parlamentarızm: qalyptasýy, damýy jáne zań shyǵarý protsesinde bılik tarmaqtary arasyndaǵy ózara is qımyldy jetildirý» atty taqyrypta halyqaralyq konferentsııa óz jumysyn bastady.
Halyqaralyq shara Elbasy N. Nazarbaevtyń «Qazaqstan -2050» strategııasyn iske asyrý boıynsha jalpyulttyq josparǵa saı uıymdastyrylǵan. Jıyn barysynda Qazaqstan Parlamentiniń ókildigin kúsheıtý, parlamentarızm damýyndaǵy zańnama sapasyn arttyrý, bılik tarmaǵy arasyndaǵy ózara is-qımyldy jetildirý máseleleri talqylanatyn bolady. Sharaǵa Parlament depýtattary, QR Konstıtýtsııalyq Keńes pen Joǵarǵy sot tóraǵalary, QR Prezıdenti Ákimshiligi men Bas prokýratýra ókilderi, mınıstrler, sonymen qatar, TMD Parlamentterinen kelgen delegattar qatysýda.
«Parlament júıesindegi sheteldik damý tájirıbesi kórsetkenindeı, olardyń damý protsesi úzilmeı jalǵasyp keledi. Al, belgili bir quqyqtar men ókildikterge ıe bolǵan halyqtyń ókildik júıesi retinde parlamentarızmniń jumysyn jetildirý onyń ómirsheńdiginiń mańyzdy atrıbýty. Sondyqtan da bılik ınstıtýty ınnovatsııalyq jańalyqtarǵa turaqty túrde saı bolýy kerek. Olaı bolmasa bul qoǵamdyq qatynastardyń tejegishine aınalýy múmkin», dedi jıyndy ashqan Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Serik Aqylbaı.
Onyń aıtýynsha, memlekettik saıası quqyqtyq júıede tıimdi Parlamenttiń bolýy qoǵamnyń jan-jaqty jetilgenin bildiredi. Al álemdik tájirıbege saı, parlamentarızm - demokratııanyń ajyramas quramy.
