Parlamentarızmdi damytý Tuńǵysh Prezıdenttiń strategııalyq basshylyǵymen búgin de jalǵasyn taýyp keledi - I. Rogov
ASTANA. 26 qarasha. QazAqparat - Parlamentarızmdi damytý Tuńǵysh Prezıdenttiń strategııalyq basshylyǵymen búgin de jalǵasyn taýyp keledi. Búgin «Qazaqstan Respýblıkasynyń Tuńǵysh Prezıdenti - Elbasy N.Á Nazarbaevtyń Qazaqstandaǵy parlamentarızmdi damytýdaǵy róli» atty halyqaralyq konferentsııa barysynda QR Konstıtýtsııalyq Keńesiniń tóraǵasy Igor Rogov osylaı aıtty.
«Memlekettik qurylym men qoǵam ómirin demokratııalaý úderisi parlamentarızm ınstıtýtyn damytýdan naqty kórinis tabady. Táýelsizdik alǵan sátten bastap Qazaqstanda memleket pen qoǵamnyń ornyqty damý faktory retindegi parlamentarızmniń negizi qalandy. Ótken ǵasyrdyń 90-jyldarynda bastaý alǵan kásibı parlamentarızmdi qalyptastyrý, sosyn damytý Tuńǵysh Prezıdenttiń strategııalyq basshylyǵymen búgin de jalǵasyn taýyp keledi», - dedi I. Rogov.
Sonymen qatar, Keńes tóraǵasy Táýelsizdiktiń alǵashqy jyldaryna kóz júgirte otyryp, onyń irgetasyn sapaly qalyptastyrýdaǵy Elbasynyń eren eńbegin atap ótti.
«Memleket basshysy N. Nazarbaev egemendik alǵan alǵashqy kúnnen bastap «táýelsizdik jaǵdaıynda, jańa qozǵalystar úderisinde partııalyq dıktat pen partııalyq qurylymdardy alyp tastap-aq keńestik júıeni saqtaý múmkindigi týraly ıdeıaǵa barynsha kúmán keltirdi». Óıtkeni, Elbasy keńestik júıeniń jumysyn bastan-aıaq biletin. Al kommýnıstik partııa qoǵam men el basshylyǵynan kete bastaǵan tusta, partııalyq dıktattan aıyrylǵan keńester demokratııaǵa basymdyq bergisi keletinin bildire bastady. Alaıda, ómir kórsetkendeı keńester demokratııalyq memleket úshin jaramsyz edi jáne keńester qoǵam damýyna esh múmkindik bermedi», - dedi I. Rogov.
Bul rette I. Rogov HІІ jáne HІІІ shaqyrylǵan Joǵarǵy Keńestiń jumysyn da mysalǵa aldy. Onyń aıtýynsha, turaqty negizde jumys jasaǵan sońǵy Joǵarǵy Keńes te óziniń tıimsizdigin tanytqan. «Máselen, óziniń qyzmet etken bir jylynda Joǵarǵy Keńes bas-aıaǵy 24 qana zań qabyldaı aldy. Qalǵan ýaqyttyń bári zań shyǵarmashylyǵymen baılanysty bolyp sanalmaıtyn jumystarmen, saıası pikirtalastarmen ketti. Sondyqtan da, Tuńǵysh Prezıdent múldem jańa Parlament qurý týraly másele qoıǵan edi», - dep eske alady I. Rogov.
