Parlamentaralyq forým EQYU keńistiginde yntymaqtastyq pen ózara túsinistik protsesinde jańa serpin beredi - Májilis Tóraǵasy
ASTANA. Mamyrdyń 14-i. QazAqparat - Parlamentaralyq forým EQYU keńistiginde yntymaqtastyq pen ózara túsinistik protsesinde jańa serpin beredi. Óıtkeni osy mańyzdy basqosýǵa qatysýshylar óz halqynyń senimdi ókilderi bolyp tabylady.
Bul jóninde búgin Almaty qalasynda «EQYU-nyń Eýrazııalyq ólshemi» atty Transazııalyq parlamenttik forýmnyń ashylýynda QR Parlamenti Májilisiniń Tóraǵasy Oral Muhamedjanov málimdedi, dep habarlaıdy QazAqparat Májilistiń baspasóz qyzmetine silteme jasap.
Sonymen birge, QR Parlamenti Májilisiniń Tóraǵasy O. Muhamedjanov aımaqtaǵy qaýipsizdik pen turaqtylyqty nyǵaıtýda, áleýmettik-ekonomıkalyq salany qarqyndy damytýda, tózimdilik pen mádenıetaralyq kelisim ıdeıasyn alǵa bastyrýda Qazaqstannyń biregeı tájirıbesi bar ekenin atap ótti. «Osy ashylǵan «EQYU-nyń eýrazııalyq ólshemi» atty Transazııalyq parlamenttik forýmǵa EQYU-ǵa qatysýshy memleketterdiń ulttyq parlamentteri delegatsııalarynyń, Jerorta teńizi aımaǵy men Azııadaǵy seriktes memleketter parlamentshileri men halyqaralyq uıymdar ókilderiniń qatysýy Qazaqstanǵa degen senimdi aıqyndap tur jáne de elimizdiń halyqaralyq qaýymdastyqtaǵy bedelin kórsetedi», dedi Májilis Tóraǵasy.
Sonymen birge, parlamentshilerge arnaǵan sózinde Oral Muhamedjanov belsendi dıalog pen tyǵyz yqpaldastyq jahandyq jáne eýrazııalyq aýqymda jańa turaqsyz shaqyrýlar baıqalyp turǵan jaǵdaıda qaýipsizdikti qamtamasyz etýde óte mańyzdy faktor ekenine toqtaldy. Sonymen qatar, ol qarjy-ekonomıkalyq jáne azyq-túlik daǵdarysyn, tabıǵat apattaryn (mysaly, Islandııadaǵy janartaýdyń atqylaýy) jáne tehnogendik kataklızmderdi (aıtalyq, Meksıka shyǵanaǵyndaǵy munaı platformasynyń jarylýy saldarynan teńizge munaı aǵýy), qorshaǵan ortanyń ekologııalyq jaǵdaıynyń nasharlarýyn esten shyǵarýǵa bolmaıtynyn atap ótti.
«Sondaı-aq halyqaralyq lańkestiktiń belsendiligi arta túsýi, dinı jáne saıası ekstremızm, esirtki saýdasy, zańsyz kóshi-qon jáne zańsyz qarý-jaraq aınalymy sózsiz alańdaýshylyq týdyryp otyr. Ǵalamdyq qaýipsizdikti qamtamasyz etýde azııalyq baǵyttyń mańyzdylyǵy artýda jáne EQYU qyzmetiniń eýrazııalyq qyryna qatysty taqyryby óte ózekti bola túsýde», dedi O. Muhamedjanov.
