Parlament jumysy odan saıyn ashyq bola túsedi - Májilis spıkeri
ASTANA. 28 maýsym. QazAqparat - Parlament jumysy aldaǵy ýaqytta odan saıyn ashyq bola túsedi.
Búgin besinshi saılanǵan Parlamenttiń ekinshi sessııasynyń jabylýyna arnalǵan birlesken otyrysta Májilis spıkeri Nurlan Nyǵmatýlın osylaı málim etti.
Májilis Tóraǵasynyń aıtýynsha, zań shyǵarýshy bıliktiń jumysy eń aldymen qalyń jurtshylyqty alańdatatyn máselelerdi shapshań sheshýge baǵyttaldy. Al bundaı úderiste barynsha ashyqtyq pen jurtshylyq arasynda ekijaqty dıalog mańyzdy ról atqarady. Osyǵan oraı Májilis spıkeri qoǵammen baılanystyń dástúrli formasynan bólek, jumystyń jańa formaty da engizilip jatqanyn tilge tıek etti. «Bundaı quraldardyń biri Májilistiń jalpy otyrystaryn Internet arqyly onlaın-taratý bolmaq. Budan bylaı Májilistiń resmı saıtynda barlyq paıdalanýshylar belgili bir zań jobalarymen depýtattardyń jumystaryn qaraı alady. Barlyq parlamenttik fraktsııalardyń talqylaýlaryn, eń mańyzdysy zań jobasyn ázirleýshilerdiń depýtattar aldynda óz pozıtsııalaryn qalaı qorǵaıtynyn qalyń jurtshylyq tikeleı biletin bolady», - dedi N. Nyǵmatýlın.
Onyń sózine qaraǵanda twitter, Facebook, YouTube sekildi áleýmettik jelilerde Májilistiń paraqsha akkaýnttary ashylǵan.
«Sózsiz, mundaı format Parlament jumysyn qoǵamnyń keń aýqymy úshin barynsha ashyq, móldir ete alady», - dedi spıker.
