Parlament jumysy depýtattardyń belsendiligine baılanysty - zańger

QYZYLORDA. KAZINFORM – Qyzylorda qalasynda ótken V Ulttyq quryltaıda Prezıdent elimizde bir palataly Parlament qurylatynyn málimdedi. Zańger Aıman Omarova bul elimizdegi saıası-ekonomıkalyq reformalardy jańa deńgeıge shyǵaratynyna senimdi.

Alqaly jıynda Memleket basshysy elimiz endi bir palataly Parlamentke kóshetinin, bul jerde qandaı da bir pikir qaıshylyǵy joq, baǵyt-baǵdarymyz aıqyn, aldaǵy ózgeristerge qatysty ortaq mámile bar ekenin atap ótti.

- Ol 145 adamnan, 8 komıtetten quralýy múmkin. Parlament ataýyn «quryltaı» sózimen aýystyrý da qazaqtyń kóńiline jaǵatyny sózsiz. Zańger retinde bir palataly Parlament bolǵannan zańdardyń sapasy aqsaıdy dep oılamaımyn. Sapa onyń eki palataly, ıaǵnı Májilis pen Senattan quralǵanyna emes, depýtattardyń belsendi ári sapaly jumys isteýine baılanysty. Jaqynda Vashıngtondaǵy AQSh Kongresiniń májilisteri ótetin úıi Kapıtolııge barǵanmyn. Alpaýyt eldiń zań shyǵarýshy organy qalaı jumys isteıtinin kórdim. Sotta ótetin jaryssóz sııaqty tartysqa toly otyrysyna kýá boldym. Depýtattar amerıkalyq áriptesteri sııaqty halyqtyń qamyn kúıttep, oı-pikirin taısalmaı aıtyp, joǵary jaqqa jetkize alǵanda ǵana halyqtyń ómir súrý sapasy jaqsara túsedi, - dedi zańger.

Aıman Omarova bir palataly Parlamentten osyndaı sapa kútetinin jetkizdi. Sondaı-aq quryltaıda kótergen bastamalary zań retinde qabyldanyp, júzege asyp jatqanyna rıza.

- Meniń usynystarym kóbine áıelder men balalardyń quqyǵyn qorǵaýǵa baılanysty. Onyń ishinde advokattyq júıeni qaıta qaraý, zorlyq-zombylyqqa ushyraǵan balalardyń jeke derekterin buqaralyq aqparat quraldaryna taratýǵa tyıym salý týraly usynysym erekshe qaraldy. Bul baǵyttaǵy jumystardy óte mańyzdy dep esepteımin, - dedi ol.

Aıta keteıik, Prezıdent búgin quryltaıda aldaǵy reformaǵa qatysty pikir aıtty.