Parlament Joldaý negizinde berilgen tapsyrmalarǵa sáıkes, birinshi kezekte «Ǵylym týraly» zańdy qabyldaıdy - S.Dıachenko
ASTANA. Aqpannyń 1-i. QazAqparat /Aıdar Ospanalıev/ - Memleket basshysynyń Joldaýynda óte jan-jaqty ári aýqymdy máseleler aıtyldy. Soǵan qaramastan olardy tolyq júzege asyrýǵa múmkindik bar. Osyǵan oraı qazir Úkimet pen ákimshilikter erekshe qarqynmen jumys isteýleri qajet. Parlament Májilisiniń depýtaty Sergeı Dıachenko Memleket basshysynyń bıylǵy Joldaýyna qatysty osyndaı pikir bildirdi,
dep habarlaıdy QazAqparat.
Onyń sózine qaraǵanda, Parlamentke Joldaýda kóterilgen mindetter negizinde naqty tapsyrmalar berilgen. Oǵan sáıkes, Parlament birinshi kezekte «Ǵylym týraly» zańdy qabyldaýy qajet. «Biz qazir atalmysh qujattyń jobasyn asyǵa kútýdemiz. Sebebi ol elimizdiń básekege qabilettiligin arttyryp, ǵylym salasynyń órkendeýine jańa serpin beredi. Qazirgi tańda atalmysh qujat boıynsha Úkimette belsendi jumystar júrgizilip jatqan kórinedi. Bul óte mańyzdy jáne bizdiń elimiz úshin qajetti zań», dedi depýtat.
