Parlament jergilikti atqarýshy organdarǵa qajetti ókilettikter men tıisti shtattyq quram beretin zańdy qabyldady
ASTANA. 6 maýsym. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý organdary arasyndaǵy ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qaralyp, qujat qabyldandy.
Parlament qabyldaǵan qujat Memleket basshysynyń qol qoıýyna joldanady.
Qujat ótken jylǵy qarasha aıynda barlyq deńgeıdegi ákimderdiń qatysýymen ótken keńeste Memleket basshysy bergen tapsyrmany, sondaı-aq «Qazaqstan - 2050» Strategııasy: qalyptasqan memlekettiń jańa saıası baǵyty» Joldaýynda aıtylǵan mindetterdi iske asyrý maqsatynda ázirlengen bolatyn. Bul rette qujat boıynsha memlekettik organdardyń mindetterin bekitýdi zańnamalyq turǵyda retteý, memlekettik basqarý deńgeıleri arasyndaǵy ókilettikterdiń qaıtalanýyn alyp tastaý jáne jergilikti atqarýshy organdardy nyǵaıtý kózdeledi. Sondaı-aq memlekettik basqarýdyń tıimdi júıesin qurý maqsatynda ortalyq jáne jergilikti atqarýshy organdar arasyndaǵy memlekettik basqarýdyń meılinshe ońtaıly deńgeıin anyqtaý qarastyrylady.
Tutastaı alǵanda, Parlament qabyldaǵan zań elimizdiń memlekettik basqarý júıesin odan ári jetildirý, bólinetin fýnktsııalardy zańnamalyq bekitý, memlekettik basqarý deńgeıleri arasyndaǵy ókilettikterdiń arajigin ajyratý, jergilikti jáne ortalyq memlekettik organdar qyzmetiniń qaıtalanýyn boldyrmaý qajettigine baılanysty bolyp otyr. Bul rette zań jobasy boıynsha ortalyq memlekettik organdar arasynda - 10 fýnktsııa, ortalyqtan oblysqa - 73, oblystan aýdanǵa - 4, aýdannan aýylǵa 7 fýnktsııa qaıta bólinetin bolady. Nátıjesinde ortalyqtan oblystyq deńgeıge ótkiziletin ókilettikterge 620 shtattyq birlik beriledi. Budan bólek, zań arqyly aýdandyq (qalalyq) deńgeıde qosymsha fýnktsııalar bekitiledi jáne atalǵan fýnktsııalar oblystyq, Astana jáne Almaty qalalarynyń ákimdikterinde de saqtalady. Barlyǵy aýdandyq deńgeıge beriletin shtat sany - 431 birlik. Al aýyldyq okrýg ákimderine salalyq zań aktilerimen 67 qyzmet júkteledi jáne olardyń apparattaryn nyǵaıtý maqsatynda ortalyqtan aımaqtarǵa 4 369 birlik, sondaı-aq oblystyq jergilikti atqarýshy organdardan 500 birlik beriledi. Zańdy qabyldaý memlekettik basqarý deńgeıleri arasyndaǵy ókilettikterdiń arajigin ajyratýǵa jáne jergilikti atqarýshy organdarǵa qajetti ókilettikter men tıisti shtattyq quram berýge múmkindik beredi.
