Parlament jeke sot oryndaýshylary ınstıtýtyn qurýdy kózdeıtin zańdy qabyldady
ASTANA. Naýryzdyń 5-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Atqarýshylyq is júrgizý jáne sot oryndaýshylarynyń mártebesi týraly» zań jobasy boıynsha kelisim komıssııasynyń usynystaryn talqylady. Sonymen birge, palata qalysymen atalǵan zań qabyldandy,
dep habarlaıdy QazAqparat.
Atalǵan qujat boıynsha elimizde oryndaýdyń memlekettik júıesimen qatar jeke sot oryndaýshylary ınstıtýtyn qurý maqsaty kózdelip otyr. Bul óndirip alýshylarǵa memlekettik nemese jeke sot oryndaýshysyna júginýdi tańdaý quqyǵyn beredi. Mamandardyń pikirinshe, jeke sot oryndaýshylarynyń ınstıtýtyn engizý qosymsha bıýdjet qarajattaryn jumsamaı-aq oryndaýdyń memlekettik júıesiniń júgin jeńildetýge múmkindik týǵyzady.
Tutastaı alǵanda, Parlament qabyldaǵan zań sot sheshimderiniń oryndalý sapasyn arttyrady jáne sot pen ózge de organdar aktileriniń naqty ári múltiksiz oryndalýyna járdemdesedi. Sondaı-aq jeke oryndaýshylyq ınstıtýtyn engizý bıýdjetke túsetin salyq túsimderiniń ulǵaıýyna sep bolady.
Esterińizge sala keteıik, qujatqa qatysty qos palata arasyndaǵy kelisim komıssııasy 14 ustanymdy talqylady. Bulardyń 5-eýi Senat usynǵan, 9-y birlesken redaktsııada qabyldandy.
