Parlament «Jalaqyny qorǵaý týraly» konventsııany qabyldady
ASTANA. QazAqparat - Búgin Parlament Senatynyń jalpy otyrysynda palata depýtattary «Jalaqyny qorǵaý týraly konventsııany (95-konventsııa) ratıfıkatsııalaý týraly» QR Zańyn qabyldady.
Parlament qabyldaǵan Konventsııa memlekettiń jalaqyny qorǵaý normalaryn qamtamasyz etýge baǵyttalady. Bul Konventsııany Halyqaralyq Eńbek Uıymyna múshe 97 memleket qabyldaǵan. Al buǵan qajetti alǵysharttar búgingi tańda Qazaqstanda da qalyptasyp otyr. Sonymen qatar, qujatty qabyldaý jalaqyny qorǵaý bóliginde halyqaralyq standarttardy odan ári engizýdi qamtamasyz etedi jáne elimizdiń osy saladaǵy halyqaralyq normalardyń saqtalýy men oryndalýyn ustanatynyn rastaıdy. Budan bólek, konventsııada jalaqynyń ýaqytyly jáne turaqty tólenip turý tártibi, ony shekten tys shegerimderden qorǵaý aıqyndalǵan.
Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, Konventsııanyń uıǵarymdary ekonomıkanyń barlyq salalaryna qatysty jáne jalaqy esepteletin nemese tólenetin adamdardyń barlyǵyna birdeı qoldanylady. Budan bólek, Konventsııada jalaqyny ýaqytyly jáne júıeli tóleýdiń, ony shekten tys ustap qalýlardan, kásiporyn bankrot bolǵan nemese taratylǵan jaǵdaıda jalaqyny qorǵaý qarastyrylady.
Jalpy, qujatta eńbekshiniń jalaqy somasy men jalaqyny ustap qalý týraly aqparatty alý, sonymen birge, jalaqysyn óz erkimen paıdalaný quqyǵy da qarastyrylǵan.
