Parlament zeınetaqyny 30 paıyzǵa kóterýge baǵyttalǵan zańdy qabyldady
ANA. 25 qarasha. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynda zeınetaqymen qamsyzdandyrý týraly» zańyna ózgerister engizý týraly» zańdy qabyldady.
Zań Elbasynyń qol qoıýyna jiberiledi.
Zań halyqty zeınetaqymen qamsyzdandyrý deńgeıin kóterý jáne Memleket basshysynyń 2008 jylǵy 6 aqpandaǵy Joldaýyn iske asyrý maqsatynda ázirlengen. Qujatqa sáıkes, 2011 jylǵy 1 qańtardan bastap zeınetaqy tólemderiniń mólsheri 30 paıyzǵa kóteriletin bolady.
«Elbasy Joldaýynda zeınetaqynyń ortasha mólsheri 2012 jylǵa qaraı 2007 jylmen salystyrǵanda 2,5 ese arttyrylýy kózdelgen. Soǵan baılanysty 2009 jyly zeınetaqy 25 paıyzǵa, 2010 jyly - 25 paıyzǵa, kelesi jyldan bastap 30 paıyzǵa arttyrý qarastyrylady. Zań arqyly zeınetaqy tólemderin esepteý úshin eskeriletin eń kóp tabysty shekteýdi 32 eselengen aılyq eseptik kórsetkishten 39 eselengen kórsetkishke deıin jáne áskerı qyzmetshiler qatarynan shyqqan zeınetkerlerdiń eńbek sińirgen jyldary úshin beriletin eń joǵary zeınetaqysyn 86 eselengen aılyq eseptik kórsetkishten 104 eselengen kórsetkishke deıin kóbeıtý kózdeledi», - dedi Eńbek jáne halyqty áleýmettik qorǵaý mınıstri Gúlshara Ábdihalyqova.
Onyń aıtýynsha, zań normasy barlyq zeınetaqylardy 30 paıyzǵa arttyrýdy qamtamasyz etedi. Bundaı is-sharalardyń nátıjesinde jańadan taǵaıyndalǵan zeınetaqylardyń mólsherin esepteý úshin eskeriletin eń joǵary tabys 2011 jyly 58 myń 968 teńgeni quraıtyn bolady. Al áskerı qyzmetshiler qatarynan shyqqan zeınetkerlerdiń eńbek sińirgen jyldary úshin beriletin zeınetaqysynyń eń joǵary mólsheri 157 myń 248 teńgeni quraıdy.
«Jalpy alǵanda 2011 jyly bazalyq zeınetaqy eń tómengi kúnkóris zeńgeıiniń 50 paıyzyn qurap 8 myń tegege deıin kóteriledi. Osylaısha, eń tómengi zeınetaqy -24 myń 47 teńge, ortasha zeınetaqy - 35 myń 950 teńge jáne joǵary zeınetaqy 52 myń 226 teńgeni quraıtyn bolady», - dedi mınıstr.
