Parlament Ujymdyq qaýipsizdik týraly shart uıymynyń Ujymdyq jedel den qoıý kúshteri týraly kelisimin qabyldady
ASTANA. Aqpannyń 4-i. QazAqparat /Qanat Mámetqazyuly/ ‑ Búgin QR Parlamenti Senatynyń jalpy otyrysynda «Ujymdyq qaýipsizdik týraly shart uıymynyń Ujymdyq jedel den qoıý kúshteri týraly kelisimdi ratıfıkatsııalaý týraly» zańy qabyldandy.
Endi qujat Memleket basshysynyń qol qoıýyna jiberiledi, dep habarlaıdy QazAqparat.
Atalǵan kelisimge 2009 jyldyń maýsymynda Máskeý qalasynda qol qoıylǵan bolatyn. Kelisimniń maqsaty qarýly shabýyldarǵa, onyń ishinde basqynshylyqqa toıtarys berý, múshe memleketterdiń ujymdyq qaýipsizdigine basqa da qyr kórsetýler men qaýip tóndirýlerge qarsy is-qımyl jasaý úshin kúsh-jigerdi biriktirý bolyp tabylady. Bul rette taraptardyń koalıtsııalyq negizinde Ujymdyq jedel den qoıý kúshteri qurylatyn bolady. «Bul kúshter Uıymǵa múshe memleketterdiń qaýipsindigine týyndaǵan qaýip-qaterge jedel den qoıýǵa arnalady. Olardyń basty mindetteri qarýly shabýyldyń aldyn alý jáne oǵan toıtarys berý, halyqaralyq terrorızmge, esirtki quraldary, qarý men oq-dárilerdiń zańsyz aınalymyna qarsy kúresý, sondaı-aq tótenshe jaǵdaılardy joıý jáne tótenshe gýmanıtarlyq kómek kórsetý jónindegi is-sharalarǵa qatysý bolyp tabylady», dedi qujat boıynsha baıandama jasaǵan QR Qorǵanys mınıstriniń orynbasary Bolat Sembınov.
Den qoıý kúshteri uıymnyń ujymdyq qaýipsizdigi júıesiniń kúshteri men quraldarynyń turaqty ázirliginiń quramdas bóligine aınalady. Sonymen birge, Ujymdyq jedel den qoıý kúshterine birqatar negizgi mindetter júkteledi. Atap aıtqanda, qarýly shabýyldyń, onyń ishinde basqynshylyqtyń jolyn kesýge, toıtarys berýge, qarýly janjaldardy oqshaýlaýǵa qatysý, halyqaralyq lańkestikke, esirtki zattary men qarý-jaraq, oq-dárilerdiń zańsyz aınalymyna, transulttyq uıymdasqan qylmystyń basqa da túrlerine qarsy kúres jónindegi is-sharalarǵa qatysý júkteledi.
Ujymdyq jedel den qoıý kúshteriniń quramyn taraptardyń usynystary negizinde Ujymdyq qaýipsizdik keńesi bekitedi. Olardy jasaqtaý úshin qatysýshy memleketter óz ulttyq zańnamasyna sáıkes qazirgi zamanǵy úılesimdi qarý-jaraqpen, áskerı tehnıkalarmen jaraqtandyrylǵan arnaıy maqsattaǵy kúshter qurylymdaryn bóletin bolady. Budan basqa, Ujymdyq jedel den qoıý kúshteri kontıngentterin basqarý úshin Qolbasshylyq qurylady.
