Parlament uıymdar qyzmetine memlekettik organdardyń zańsyz aralasýyna tosqaýyl qoıatyn qujatty qabyldady

ASTANA. 21 qarasha. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine zańdy tulǵalardy memlekettik tirkeý jáne fılıaldar men ókildikterdi eseptik tirkeý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristerdi qarady.

Nátıjesinde Májilis senatorlar engizgen ózgeristermen kelisip, qujatty qabyldady.

Qujat Qazaqstan Respýblıkasynyń 2020 jylǵa deıingi Quqyqtyq saıasat tujyrymdamasyn iske asyrý maqsatynda ázirlengen. Atalǵan tujyrymdamada tirkeý, ruqsat berý-lıtsenzııalaý rásimderin ońaılatý, kommertsııalyq jáne kommertsııalyq emes uıymdardyń qyzmetine memlekettik organdardyń zańsyz aralasýyna tosqaýyldar qoıý jónindegi jumystardy jalǵastyrý máselesi qarastyrady. Osyǵan oraı, zań jobasymen zańdy tulǵany qurý rásimin ońaılatý jóninde birqatar sharalar kózdelip otyr. Atap aıtqanda, shaǵyn kásipkerlik sýbektilerin tirkeýdiń ruqsat berý tártibin habarlama tártibine kóshirý qarastyrylady. Internet jelisi arqyly tirkeý engizilip, zańdy tulǵany memlekettik tirkeý jáne fılıal men ókildikterdi eseptik tirkeý týraly kýáliktiń qaǵazdaǵy qalpy elektrondyq anyqtamaǵa aýystyrylady. Budan bólek, tirkeý barysynda sharýashylyq seriktestiginiń jarǵysyn usynýdy alyp tastaý kózdeledi.

Májilis maquldaǵan zań jobasyna Senat redaktsııalyq naqtylaý sıpatynda túzetýler usynǵan bolatyn.