Parlament úsh jyldyq bıýdjetti bekitti

ASTANA. KAZINFORM — Búgin Parlament Májilisiniń jalpy otyrysynda palata depýtattary «2026 — 2028 jyldarǵa arnalǵan respýblıkalyq bıýdjet týraly» Zańyna Senaty engizgen túzetýlermen kelisti.

— Bıyl 20 qarashada bul qujat Senattyń jalpy otyrysynda qaraldy. «2026 — 2028 jyldarǵa arnalǵan respýblıkalyq bıýdjet týraly» Zańyna Senat 76 túzetý engizdi. Atap aıtqanda, óńirlerge beriletin sýbventsııalar kólemi 17,5 mlrd teńgege ulǵaıtyldy. Sonymen qatar, 2026 jyly óńirlerdi damytýǵa qosymsha 28,5 mlrd teńge baǵyttalmaq. Bul qarajat jylý jáne elektr energııasy salalaryn gazben jabdyqtaýdy, jaǵalaýdy nyǵaıtý jumystaryn jáne basqa da baǵyttardy qamtıdy. Óńirlerge qosymsha qarajat bólýdiń kózi retinde Úkimettiń rezervi men úkimettik boryshqa qyzmet kórsetýge arnalǵan shyǵystar aıqyndaldy. Budan bólek, 79 mlrd teńge túrli memlekettik organdar arasynda qaıta bólindi. Al 73,4 mlrd teńge bir memlekettik organnyń óz ishinde bıýdjettik baǵdarlamalar arasynda qaıta bólingen qarajatqa tıesili, — dedi Májilis depýtaty Ulasbek Sádibekov.

Onyń aıtýynsha, Senat engizgen túzetýler atalǵan respýblıkalyq bıýdjet jobasynyń parametrleriniń teńgerimdigin buzbaıdy jáne óńirler men ekonomıkanyń turaqty damýyna baǵyttalǵan. 

— Osy oraıda Májilistiń Qarjy jáne bıýdjet komıteti bul zańǵa Senat engizgen ózsheristermen kelisýdi usynady, — dedi depýtat.

Daýys berý barysynda palata depýtattary atalǵan usynysqa qoldaý bildirdi.

Eske salsaq, bıyl 20 qarashada Senattyń jalpy otyrysynda «2026 — 2028 jyldarǵa arnalǵan respýblıkalyq bıýdjet týraly» Zańy talqylandy. Senat qujattyń jekelegen baptaryn jańa redaktsııada usynyp, ony Májiliske qaıtardy.