Parlament Ulttyq qordan beriletin transfertter týraly zańdy qabyldady
ASTANA. 21 qarasha. QazAqparat - Búgin Parlament Senatynyń jalpy otyrysynda palata depýtattary «QR Ulttyq qorynan 2014-2016 jyldarǵa arnalǵan kepildik berilgen transfertter týraly» QR zańyn qabyldady.
«Memleket basshysy maquldaǵan fıskaldyq retteý quraldaryn eskere otyryp, 2014-2016 jyldarǵa arnalǵan kepildik berilgen transfert 1 trln. 380 mlrd. teńge mólsherinde belgilenip otyr. Bul mólsher 2013 jylǵy deńgeıde saqtalatynyn bildiredi. Osy mólshermen 2014-2016 jyldar boıynsha Ulttyq qordaǵy qarajattyń jalpy ishki ónimniń 30 paıyz deńgeıinen azaımaıtyn qaldyǵy qaǵıdalaryn saqtaý qamtamasyz etiletin bolady», - deıdi Ekonomıka jáne bıýdjettik josparlaý mınıstri Erbolat Dosaev.
Mınıstrdiń aıtýynsha, zańdy qabyldaý bıýdjettiń turaqty kiris kózin qamtamasyz etedi. Bul óz kezeginde ekonomıkalyq belsendilikti arttyryp, ekonomıkada jumyspen qamtýǵa baǵyttalǵan bıýdjet shyǵystaryn tolyq kólemde qarjylandyrýǵa múmkindik beredi. Áleýmettik ekonomıkalyq teris saldarǵa ákep soqtyrmaıdy.
Parlament qabyldaǵan zań Memleket basshysynyń qol qoıýyna joldanady.
