Parlament Úkimetke renish bildirdi
A. Qarashanyń 17-si. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda «Taýarlardyń syrtqy saýdasy salasyndaǵy lıtsenzııalaý erejesi týraly kelisimdi ratıfıkatsııalaý týraly» jáne «Úshinshi elderge qatysty biryńǵaı kedendik aýmaqta taýarlarmen jasalatyn syrtqy saýdany qozǵaıtyn sharany engizý jáne qoldaný tártibi týraly kelisimdi ratıfıkatsııalaý týraly» Úkimet usynǵan zań jobalary jedel kún tártibine engizilip, jumysqa qabyldandy,
dep habarlaıdy QazAqparat.
Esterińizge sala keteıik, atalǵan zań jobasy Qazaqstan, Reseı, Belarýs memleketteri arasynda qurylatyn Keden odaǵynyń qyzmetine baılanysty bolyp tabylady. Al negizgi is-sharalar jospary boıynsha atalǵan úsh eldiń Memleket basshylary qarashanyń 27-sinde kezdesip, Keden odaǵyna qatysty máselelerdi sońǵy pysyqtaýdan ótkizýdi josparlaǵan bolatyn. Sondyqtan da Úkimet tarapynan usynylǵan zań jobasyn Parlament jedel qabyldaýy tıis bolyp otyr. Osyǵan baılanysty depýtat Raýan Shaekın zań jobasyn ázirleýde Úkimettiń ýaqyty jetkilikti bolǵandyǵyn aıtyp, qujatty keńinen talqylaýǵa múmkindik bolmaı otyrǵanyn atap ótti. Óz kezeginde Májilis Tóraǵasy Úkimet basshysyna tikeleı habarlasyp, osy máselege qatysty sóıleskenin aldyǵa tartty. «Premer-Mınıstrmen arada Úkimet tarapynan zań jobasyn usynýdaǵy «shabandyq» týraly renishimizdi bildirdim. Jalpy, bul qujat Keden odaǵy joǵarǵy organynyń otyrysyna oraı qabyldanýy tıis eken», dedi O. Muhamedjanov.
