Parlament Úkimetke memlekettik til máselesine qatysty birqatar usynymdar jasady
ASTANA. Jeltoqsannyń 21-i. QazAqparat /Qanat Mámetqazyuly/ - Búgin QR Parlamenti Májilisinde «Memlekettik mádenı jáne aqparattyq saıasattyń iske asyrylý barysy» taqyrybynda ótken Úkimet saǵatynyń nátıjesi boıynsha palata depýtattary birqatar usynymdar qabyldady,
dep habarlaıdy QazAqparat.
Atalǵan másele boıynsha Mádenıet jáne aqparat mınıstri Muhtar Qul-Muhammedtiń baıandamasyn tyńdaǵan depýtattar, birqatar saýaldarǵa jaýap aldy. Sonymen birge, jıyn barysynda kóterilgen máseleler saraptala kele, QR Úkimetine birqatar usynymdar qabyldandy.
«Birinshiden, «Mádenı mura» ulttyq jobasynyń ekinshi kezeńin nátıjeli jáne tolyq iske asyrý, osy joba boıynsha jarııalanǵan eńbekterdi qazaq tiline aýdarý jóninde naqty sharalar qabyldanýy tıis. Ekinshiden, «Nur Otan» HDP tujyrymdamasynda mádenıet salasyn odan ári damytýǵa arnalǵan baǵdarlamalyq maqsattardyń júzege asyrylýy qamtamasyz etilýi kerek. Úshinshiden, Tilderdi qoldaný men damytýdyń 2001-2010 jyldarǵa arnalǵan memlekettik baǵdarlamasynyń tolyq oryndalmaýy sebepteri talqylanyp, «QR Til týraly» Zańynyń iske asyrylý tetikteri saralansyn. Tórtinshiden, qazaq tiliniń memlekettik basqarý qyzmetinde qoldaný aıasy keńeıtilip, ony bilim men ǵylymnyń, osy zamanǵy elektrondyq baılanys quraldarynyń, Internet jelisiniń tiline aınaldyrý jóninde belgilengen is-sharalar odan ári jetildirilýi shart. Qazaq tilinde táýlik boıy habar taratatyn úsh telearna ashý jolyndaǵy uıymdastyrý jumystary jandandyrylsyn. Besinshiden, qazaq tilinde basylyp shyǵarylatyn jáne osy tilge aýdarylatyn ádebıetterdiń úlesin arttyrý kerek. Memlekettik tilde jaryq kórgen ádebı, ǵylymı jáne basqa da eńbekterdi álem tilderine sapaly aýdarýǵa qol jetkizýdiń tıimdi joldary qamtylýy shart», delingen depýtattar qabyldaǵan usynymda.
Budan basqa, Parlament Májilisi Úkimetke «Onomastıka týraly» zań jobasyn ázirleýdi, ulttyq qundylyqtarǵa, patrıotızm ıdeıasyna úndeıtin kınotýyndylardyń taqyrybyn, baǵytyn anyqtaýmen aınalysatyn ulttyq komıssııa qurýdy usyndy.
