Parlament Úkimet usynǵan zań jobalarynyń sapasyn erekshe baqylaıtyn bolady - Májilis Tóraǵasy
ASTANA. 28 maýsym. QazAqparat - Parlament Úkimet usynǵan zań jobalary men ilespe saraptamalardyń sapasyn erekshe baqylaıtyn bolady.
Búgin besinshi saılanǵan Parlamenttiń ekinshi sessııasynyń jabylýyna arnalǵan birlesken otyrysta Májilis spıkeri Nurlan Nyǵmatýlın osylaı málim etti.
Májilis Tóraǵasy baıandama barysynda Parlament pen Úkimet arasyndaǵy barynsha jemisti ózara baılanysty aıta kele, zań shyǵarmashylyǵy úderisine jaǵymsyz áser etetin máseleler de bar ekenin alǵa tartty. «Eń ótkir máseleniń biri - Parlamentke kelip túsetin zań jobalary ár ýaqytta da tolyqtaı daıyndyqtan ótpeı júr. Keıbir jaǵdaıda Úkimet engizgen zań jobalaryna ǵylymı-quqyqtyq, lıngvıstıkalyq jáne sybaılastyqqa qarsy saraptama qorytyndylary ýaqytynda ótkizilmeı nemese «keıingi ýaqytpen» ótkizilip júrdi. Dál osy sebepke oraı, Májilis ekinshi sessııasy barysynda 6 zań jobasyn keri qaıtardy», - dedi spıker.
Sonymen qatar, Májilis Tóraǵasy zań jobalarynyń sapasyz daıyndalýy jáne saraptamalardyń ýaqytynda jasalmaýy zań shyǵarý jumysynyń qarqynyna keri áser etip qana qoımaı, Elbasy júktegen mańyzdy mindetterdiń ýaqytynda oryndalýyna da qaýip tóndiredi.
«Sondyqtan, Parlamenttiń kelesi sessııada da zań jobalary men ilespe saraptamalardyń sapasyn erekshe baqylaıtyn bolady. Úkimet osyny nazarǵa alýǵa tıis»,-dedi Nurlan Nyǵmatýlın.
