Parlament Úkimet pen Esep komıtetiniń 2020 jylǵy bıýdjettiń atqarylýy týraly esepterin qabyldady
Birlesken otyrysta tıisti qaýly jobasy daýys berýge shyǵaryldy.
«Úkimettiń jáne Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepteri qabyldandy», - dedi Májilis tóraǵasy Nurlan Nyǵmatýlın.
Premer-Mınıstr Asqar Mamın óz sózinde 2020 jyl sońǵy 100 jyldaǵy eń daǵdarystyq kezeń bolǵanyn atap ótti.
«2020 jyl - halyqaralyq sarapshylardyń baǵalaýy boıynsha sońǵy 100 jyldaǵy eń daǵdarystyq kezeń boldy. Koronavırýs pandemııasy álemdik ekonomıkanyń damý jaǵdaıyn jáne onyń qurylymyn túbegeıli ózgertti. Sonymen qatar, jańa áleýmettik-ekonomıkalyq úrdister qalyptasty», - dedi ol.
Premer-Mınıstrdiń atap ótýinshe, Úkimet QR Parlamentimen belsendi ózara is-qımyl jasaı otyryp, osyndaı kúrdeli kezeńde, azamattar men bıznesti qoldaýǵa baǵyttalǵan asa mańyzdy sheshimderdi der kezinde qabyldady. Buǵan QR Parlamenti orasan zor úles qosty.
«Osy sátti paıdalanyp, Parlamenttiń qos palatasynyń barlyq depýtattaryna syndarly jáne nátıjeli jumys úshin alǵys aıtqym keledi. Aýqymdy jáne ýaqtyly qoldaý sharalaryn, sondaı-aq kontrtsıkldi makroekonomıkalyq saıasatty iske asyrý 2020 jyly Qazaqstan ekonomıkasynyń tómendeýin 2,6 paıyzǵa deıin, al negizgi kapıtalǵa ınvestıtsııanyń azaıýyn 3,4 paıyzǵa shekteýge múmkindik berdi», - dedi Asqar Mamın.
Óz kezeginde Qarjy mınıstri Erulan Jamaýbaev Úkimet esebi Parlamenttiń Májilisi men Senatynda egjeı-tegjeıli qaralǵanyn, esepti talqylaý kezinde ekonomıkanyń barlyq salalary boıynsha 500-den astam suraqtar men usynystar berilgenin atap ótti.
Respýblıkalyq bıýdjettiń negizgi parametrleri tolyq atqaryldy. Bıýdjet túsimderi 12 trln 49 mlrd teńgeni nemese josparǵa 100,3 paıyzdy qurady. ıAǵnı jospar oryndaldy. Shyǵystar 98,3 paıyzǵa ıgerildi jáne 14 trln 234 mlrd teńge boldy», - dedi E. Jamaýbaev Úkimet pen Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepterin qaraý kezinde. Bıýdjet tapshylyǵy 2 trln 185 mlrd teńgeni nemese jalpy ishki ónimniń 3,1 paıyzyn qurady.
Budan bólek, Respýblıkalyq bıýdjettiń atqarylýyn baqylaý jónindegi esep komıtetiniń tóraıymy Natalıa Godýnova Ulttyq qor qarajatyn basqarýdyń tásilderin qaıta qaraý kerek ekenin alǵa tartty.
«2020 jylǵy respýblıkalyq bıýdjettiń atqarylýy COVID-19 pandemııasynan týyndaǵan qatań shekteý is-sharalarymen jáne munaı baǵasynyń rekordtyq tómendeýinen sıpattalatyn daǵdarys jaǵdaılarynda júzege asyryldy. Alaıda, Memleket basshysynyń tapsyrmalary boıynsha qabyldanǵan is-sharalardyń arqasynda Úkimet Qazaqstan ekonomıkasynyń eleýli quldyraýynyń aldyn alýǵa jáne syrtqy kúızelisterdiń saldaryn azaıtýǵa qol jetkizdi. Ulttyq qor el úshin «qaýipsizdik jastyǵy» rólin taǵy da oryndady», - dedi komıtet tóraıymy.
Degenmen, onyń atap ótýinshe, álemdik ekonomıka túbegeıli ózgerip jatqan kezeńde shıkizattyq emes kiristerdiń jańa kózderin izdeý jáne Ulttyq qor qarajatyn basqarýdyń tásilderin qaıta qaraý qajet.
«Munaı-gaz sektoryna degen táýeldilik tólem balansynyń jaı-kúıiniń nasharlaýyn jáne ulttyq valıýtanyń turaqtylyǵy táýekelin týdyrady. Kásipkerlikti, ásirese, ónerkásipti qoldaýǵa aıtarlyqtaı kúsh-jiger jumsalýy tıis», - dedi Natalıa Godýnova.
