Parlament ýaqytsha ákelý týraly konventsııany qabyldady
A. Qazannyń 14-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Ýaqytsha ákelý týraly konventsııany ratıfıkatsııalaý týraly» QR zańyn qabyldady.
Endi Parlamentpen qabyldanǵan zań Memleket basshysynyń qol qoıýyna jiberiledi.
Konventsııanyń maqsaty - ekonomıkalyq, gýmanıtarlyq, mádenı, áleýmettik jáne týrıstik baılanystarǵa qol jetkizý, olardy damytý maqsatynda ýaqytsha ákelý salasyndaǵy erejelerdiń birkelkiligin qamtamasyz etý bolyp tabylady. Sonymen birge qujat ýaqytsha ákelýdiń kedendik rejimin ońaılatý men úılestirýdi, halyqaralyq kedendik qujattar retinde ýaqytsha ákelý týraly qujattardyń standarttalǵan úlgisin qabyldaýdy kózdeıdi. Munyń ózi halyqaralyq kepildiktermen qatar, kedendik qujat pen kepildik talap etilgen jaǵdaıda ýaqytsha ákelý rásimderin jeńildetýge jaǵdaı jasaıdy. Konventsııaǵa qosylǵan kezde onyń mindetti bolyp tabylatyn qosymshasy birge qarastyrylady. Munda kedendik júk - kedendik deklaratsııany aýystyratyn jáne kórmeler men jármeńkeler ótkizýge baılanysty taýarlardy ýaqytsha ákelip, áketýdi bajsyz, jeńildetilgen túrde ári tezdetip rásimdeýdi júzege asyrýǵa múmkindik beretin halyqarlyq kedendik qujat paıdalanylady.
Zań jobasy boıynsha baıandaǵan Qarjy mınıstri Bolat Jámishevtiń aıtýynsha, búgingi tańda álemniń 61 eli onyń ishinde Reseı men Belarýs memleketteri osy konventsııanyń qosymshasyn qabyldaǵan, sondyqtan da Kedendik odaq aıasyndaǵy Qazaqstan úshin bul zańdy qabyldaý asa mańyzdy bolyp tabylady. Ýaqytsha ákelý týraly konventsııa 1990 jyldyń maýsymynda Ystambulda qabyldanǵan.
