Parlament ýákiletti organdardyń memlekettik jáne bıýdjettik josparlaýdaǵy quzyretiniń arajigin ajyratty
TANA. 27 qazan. QazAqparat /Qanat Mámetqazyuly/ - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine ýákiletti organdardyń memlekettik jáne bıýdjettik josparlaý jónindegi quzyretiniń arajigin ajyratý jáne bıýdjet protsesin jetildirý máseleleri boıynsha ózgerister men tolyqtyrýlar engizý týraly» QR Zańy eki oqylymda qaralyp, qabyldandy.
Zań jobasy elimizdegi memlekettik basqarý júıesin odan ári jetildirý týraly Prezıdent jarlyqtaryna sáıkes ázirlengen. Qujattyń negizgi maqsaty Ekonomıkalyq damý jáne saýda mınıstrligi men Qarjy mınıstrligi arasyndaǵy fýnktsııalardy bólý bolyp tabylady. «Aǵymdaǵy jyldyń tamyzynda Elbasy Úkimettiń ekonomıkalyq saıasatyn aıqyndaıtyn negizgi organdy qurý týraly jarlyqqa qol qoıǵan bolatyn. Sońǵy jyldary álemdik ekonomıkadaǵy qubylystardyń ózi jahandaǵy ekonomıkalyq jaǵdaıdy jiti baǵalap turýdy qatań talap etedi. Bul óz kezeginde respýblıka perspektıvasy úshin qandaı da bir stsenarılerge daıyndyǵyn arttyrady. Osyǵan oraı, dál búgingi tańda Úkimettiń strategııalyq josparlaýdaǵy, boljaýdaǵy jáne ekonomıkalyq saraptaýdaǵy rólin kúsheıtýdiń mańyzy artyp otyr. Bul rette Ekonomıka mınıstrligi elimizdiń ekonomıka baǵytyndaǵy damýyn bıýdjettik saıasatpen ushtastyryp aıqyndaıtyn memlekettik organ bolýy tıis», - deıdi qujat boıynsha baıandaǵan Ekonomıkalyq damý jáne saýda mınıstri Qaırat Kelimbetov.
Onyń aıtýynsha, zań jobasyna sáıkes, bıýdjettik úderisterdegi Ekonomıka mınıstrligi men Qarjy mınıstrliginiń ózara baılanys júıesindegi arajigi ajyratylady. Bul rette Ekonomıka mınıstrligi eldiń áleýmettik-ekonomıkalyq damýyn boljaýdy qalyptastyrady. Memlekettiń aldaǵy besjyldyq kezeńiniń barlyq baǵyttaryna boljaý jasap, sonyń negizinde bıýdjettik parametrler de aıqyndalady. Al Qarjy mınıstrligi Ekonomıka mınıstrligi boljaǵan parametr negizinde bıýdjetti josparlaýmen aınalysady. Bul jerdegi jańalyq: Ekonomıka mınıstrligi boljaý sheńberinde shyǵystar boıynsha áleýmettik-ekonomıkalyq damýdyń jańa basym baǵyttaryn da aıqyndap otyrady. Bıýdjettik ınvestıtsııalardyń basym baǵyttaryn da tizbeleıdi. Bıýdjetti qalyptastyrý úderisi saqtalady jáne ony qalyptastyrýda jaýapty organ Qarjy mınıstrligi bolyp tabylady.
Parlament qabyldaǵan Zań Memleket basshysynyń qol qoıýyna jiberiledi.
