Parlament Tóraǵalary Úkimetke zań jobalarynyń memlekettik tildegi mátinderiniń sapasyn jaqsartý maqsatynda arnaıy saraptamalyq top qurý týraly usynys jasady

Bul týraly QR Parlamenti Senatynyń Tóraǵasy Qaırat Mámı óziniń blogynda jazdy.

Senat spıkeriniń pikirinshe, zań jobalaryn memlekettik tilde ázirleý sapasyn jaqsartý máselesi jónindegi ótinishterdiń jıileýine baılanysty edáýir jumystar atqarylyp keledi. Memlekettik tildegi zań jobalarynyń sapasyn jaqsartý maqsatynda elimizdiń Ádilet mınıstrligi Zańnama ınstıtýtynyń janynda Lıngvıstıka ortalyǵy qurylǵan bolatyn. Ortalyq Úkimet bastamasymen ázirlengen zań jobalaryna ǵylymı-lıngvıstıkalyq saraptama jasap, memlekettik tildegi zań jobalary mátinderiniń jaqsarýyna oń yqpal etti.

«Sonymen birge halyqaralyq kelisimderdi ratıfıkatsııalaý týraly zań jobalaryn ázirleý barysynda mátinderdi memlekettik tilge aýdarý kezinde maǵynalyq, stıldik, redaktsııalyq turǵyda qatelikter oryn alyp keledi. Bul qatelikter halyqaralyq kelisimderdiń jobalaryn ázirleıtin organdar tarapynan ketedi. Ol qatelikterdi joıý úshin kelisýshi jaqtardyń birneshe ret nota almasýy qajettigin týyndatty. Mundaı derekter memlekettik tildiń halyqaralyq arenadaǵy bet-beınesine teris áser etedi den sanaımyn. Bul máseleni sheshý úshin, sondaı-aq qazaq tilindegi halyqaralyq kelisimder mátinderiniń erekshelikterin eskere otyryp, Premer-Mınıstr Keńsesiniń, Parlament Senaty men Májilisi Apparattarynyń qyzmetkerleriniń qatysýymen arnaıy saraptamalyq top qurýdy jón sanaımyn», - deıdi Senat Tóraǵasy Qaırat Mámı. Atalǵan usynysqa Parlamenttiń qos palatasynyń Tóraǵalary qol qoıyp, Úkimetke jibergen.