Parlament TMD elderiniń yntymaqtastyǵyn keńeıtýge baǵyttalǵan qujatty qabyldady
Hattamaǵa 2019 jylǵy 31 mamyrda Ashhabad qalasynda Táýelsiz Memleketter Dostastyǵyna qatysýshy memleketterdiń premer-mınıstrleri qol qoıdy. Zań jobasyn ázirleý qajettigi 2011 jylǵy 18 qazanda Sankt-Peterbýrgte Táýelsiz Memleketter Dostastyǵyna qatysýshy memleketterdiń jańa Erkin saýda aımaǵy týraly shartqa qol qoıylýyna baılanysty týyndady. Onyń kúshine enýine baılanysty birqatar halyqaralyq sharttar, onyń ishinde 1994 jylǵy 15 sáýirdegi Erkin saýda aımaǵyn qurý týraly kelisim óz áreketin toqtatty.
«Sondyqtan joǵaryda kórsetilgen Shartqa sáıkes keltirý maqsatynda Qatysýshy memleketterdiń arasynda tasymaldanatyn taýarlardy kedendik resimdeýdiń jáne kedendik baqylaýdyń tártibi týraly kelisimniń kirispesine ózgeris engiziledi. Ekinshiden, joǵaryda kórsetilgen Shartqa sáıkes keltirý jáne biryńǵaı «Táýelsiz Memleketter Dostastyǵynda taýarlardyń shyǵarylǵan elin aıqyndaý erejesin» belgileý maqsatynda Kelisimniń 2-baby 2009 jylǵy 20 qarashadaǵy ataýy osyndaı Erejege siltememen tolyqtyryldy. Úshinshiden, Kelisimniń 6-baby jańa redaktsııada jazyldy. Onyń máni qajet bolǵan jaǵdaıda Táýelsiz Memleketter Dostastyǵyna qatysýshy memleketterdiń ótkizý beketterinde birlesken kedendik baqylaýdy júzege asyrý úshin jaǵdaı jasap beredi», - dedi QR Qarjy mınıstri Erulan Jamaýbaev.
Onyń aıtýynsha, zań jobasyn ratıfıkatsııalaý taýarlardy kedendik resimdeý jáne kedendik baqylaý tártibine tujyrymdamalyq ózgerister engizýdi kózdemeıdi. Hattama TMD-ǵa qatysýshy memleketter arasynda yntymaqtastyqty keńeıtýge jáne tereńdetýge, yqpaldasýǵa jáne ózara kómek kórsetýge baǵyttalǵan. Osy Hattamany iske asyrý memlekettik bıýdjetten qarjy shyǵyndaryn qajet etpeıdi.
.
